Azərbaycan, Bakı, 15 sentyabr / Trend , müxbir Ü.İsmayılova /
İlin birinci yarısında Azərbaycanda turistlərin sayı (gələn və gedən şəxslər) keçən ilin müvafiq dövrünə nisbətən 9 faiz və ya 299,9 min nəfər artaraq 3,64 milyon nəfər olub. Bu barədə çərşənbə günü Dövlət Statistika Komitəsindən məlumat verilib.
Onlardan 49,8 faizi dünyanın 165 ölkəsindən olan turistlərdir, 50,2 faizi isə respublikadan 161 xarici ölkəyə gedənlərdir.
Turistlərin ümumi sayının 57,6 faizi Azərbaycan, 12,5 faizi Gürcüstan, 12,3 faizi Rusiya, 8,3 faizi İran, 4,6 faizi Türkiyə, 0,7 faizi Böyük Britaniya, 0,7 faizi Ukrayna, 0,3 faizi ABŞ, 0,3 faizi Qazaxıstan, 0,3 faizi Almaniya, 2,4 faizi dünyanın digər ölkələrinin vətəndaşlarıdır.
Yanvar-iyunda Azərbaycana gələnlərin sayı 1,81 milyon nəfər təşkil edib ki, bu da 2008-ci ilin birinci yarısındakından 171,2 min nəfər çoxdur. O cümlədən gələnlərdən 1,03 milyon nəfər (56,8 faiz) Azərbaycan vətəndaşları, 783,2 min nəfər isə (43,2 faiz) digər ölkələrin vətəndaşlarıdır.
Hesabat dövrü ərzində Azərbaycana gələn turistlərin 28 faizi Gürcüstan, 30 faizi Rusiya, 19,6 faizi İran, 10,5 faizi Türkiyə, 1,7 faizi Böyük Britaniya, 1,6 faizi Ukrayna, 0,8 faizi ABŞ və Qazaxıstan, 0,6 faizi Almaniya, 5,9 faizi digər ölkələrin vətəndaşlarıdır.
İlin birinci yarısında Avropa Birliyi ölkələrindən gələn turistlərin sayı 31,8 min nəfər, MDB ölkələrindən gələnlərin sayı isə 487,4 min nəfər təşkil edib. 264 min nəfər digər ölkələrin payına düşür.
İlin birinci yarısında Azərbaycandan gedən turistlərin sayı 7,6 faiz artaraq 1,82 milyon nəfərə çatıb. Onlardan 1,06 milyon nəfər və ya 58,3 faiz Azərbaycan vətəndaşları olublar.
Məqalə müəllifi ilə əlaqə ünvanı: [email protected]