Gürcüstan, Tbilisi, 07 oktyabr / Trend , müxbir N.Kirtsxaliya/
Gürcüstanın yeni iqtisadi inkişaf naziri Zurab Pololikaşvili oktyabrın 8-də Bakıya rəsmi səfər edəcək, bu barədə Trend -a nazirliyin mətbuat xidmətindən bildirilib.
Verilən məlumata əsasən, Pololikaşvili azərbaycanlı həmkarı və Azərbaycanın digər rəsmi şəxsləri ilə birgə Bakı-Tbilisi-Qars dəmiryolunun tikintisinin gedişi ilə tanış olacaq.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi planlaşdırılır. Bunun 76 km-i Turkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 mln. ton yükə çatdırmaq üçün Gürcüstanda 183 km-lik Axalkalaki- Marabda- Tbilisi dəmiryolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmiryol xətlərinin Avropa standartlarına uyğunlaşdırılması üzrə məntəqələrin tikilməsi də planlaşdırılır.
Layihə 422 mln. dollar, infrastrukturla birlikdə isə 600 mln. dollar məbləğində qiymətləndirilir. Xəttin Gürcüstan hissəsinin tikintisi üçün Azərbaycan ARDNF vasitəsilə Gürcüstanın "Marabda-Kartsaxi dəmiryolu" MMC-yə 25 il müddətinə 1 faizlə 200 mln. dollar həcmində güzəştli kredit ayırıb. Kredit dəmiryolunun istismara verilməsindən əldə olunan vəsait hesabına ödəniləcək.
Gürcüstanlı nazirin Bakıya səfərinin digər təfərrüatları barədə məlumat verilməyib.
Pololikaşvilinin ikigünlük səfəri oktyabrın 9-da başa çatacaq.
Məqalə müəllifi ilə əlaqə ünvanı: [email protected]
