Azərbaycan, Bakı, 21 oktyabr / Trend , müxbir İ.Xəlilova/
Dünya Bankının (DB) Bakıdakı nümayəndəliyinin rəhbəri Qriqori Yedjeyçak çərşənbə günü bildirib ki, DB cari ilin iyul ayından başlayan 2010-cu maliyyə ilində Azərbaycan üçün güzəştli maliyyələşdirilmənin həcminin saxlanması barədə qərar qəbul edib.
"2009-cu maliyyə ilində olduğu kimi 2010-cu ildə də Beynəlxalq İnkişaf Assosiasiyasının (BİA) xətti ilə 70 milyon dolların ayrılması planlaşdırılır", - Yedjeyçak deyib.
Onun sözlərinə görə, dünya iqtisadiyyatında vəziyyət ağır olaraq qalır və bir neçə dövlətin maliyyə ehtiyatlarına Azərbaycandan daha çox ehtiyacı var. "Lakin biz ölkədə layihələrin güzəştli maliyyələşdirilməsinin nə vaxta qədər davam edəcəyini bilmirik", - o deyib.
Ölkədə iqtisadiyyatın yüksək sürətlə inkişaf etməsi ilə əlaqədar olaraq DB hələ 2009-cu ildə Azərbaycanı BİA xətti ilə kredit alan dövlətlər qrupundan xaric etməyi planlaşdırmışdı. Lakin dünya maliyyə böhranının dərinləşməsi şəraitində bank ölkəyə güzəştli kreditlərin verilməsinə davam edib.
Məqalə müəllifi ilə əlaqə ünvanı: [email protected]