Azərbaycan, Bakı, 21 oktyabr / Trend , müxbir E.İsmayılov/
Azərbaycanın iri metallurgiya müəssisəsi olan "Baku Steel Company" ASC ilin sonunadək 200-250 min ton məhsul istehsal etməyi planlaşdırır. Bu barədə çərşənbə günü ASC-nin İctimaiyyətlə əlaqələr departamentinin rəhbəri Namiq Əhmədov deyib.
Əhmədovun sözlərinə görə, müəssisənin orta aylıq məhsul istehsalı 22 min tona yaxındır. İstehsalat üçün bir dəfə yarımdan artıq metal xammalı lazımdır. Müəssisənin üzləşdiyi problemlərdən ən birincisi əvvəllər müşahidə olunan xammal defisiti olub. Müəssisənin yarandığı gündən nominal gücdə istehsalatı başa çatdırmamağının əsas səbəbi xammal bazasının çatışmazlığı olub. Lakin hazırda xammalın alınması ilə bağlı vəziyyət normallaşıb.
"Zavodun illik gücü 350 min ton xammal hesablanıb, lakin biz faktiki olaraq 220-250 min ton məhsul istehsal edirik, bunun da əsas səbəbi xammal çatışmazlığı olub. İndi hər şey normallaşıb", - Əhmədov deyib.
"Hazırda zavod tərəfindən alınan bir ton metal xammalının qiyməti 115-120 dollar arasında dəyişir. Müəssisə tərəfindən satılan bir ton hazır məhsulun qiyməti isə təxminən 530 manatdır", - o bildirib.
Onun sözlərinə görə, məhsulun böyük hissəsi daxili bazara satılır, az bir hissəsi isə ixrac edilir.
"Müəssisəmizin yarandığı vaxtdan əsas vəzifəsi daxili bazarın inşaat materiallarına olan tələbatını ödəmək olub", - Əhmədov əlavə edib.
Baku Steel Company bu yaxınlarda mülkiyyət formasını ASC-yə dəyişərək qeydiyyatdan keçib. ASC-nin nizamnamə kapitalı 36 milyon manat təşkil edir.
20 oktyabra olan rəsmi məzənnə 0,8031 AZN/USD təşkil edir.
Məqalə müəllifi ilə əlaqə ünvanı: [email protected]
