Azərbaycan, Bakı, 21 oktyabr / Trend , müxbir İ.Xəlilova/
Dünya Bankının (DB) Azərbaycanda fəaliyyət dövrü ərzində ümumi dəyəri 2,607 milyard dollar olan 50 layihənin maliyyələşdirilməsi üzrə razılıq imzalanıb. Bu barədə ölkənin Baş nazirinin birinci müavini Abid Şərifov çərşənbə günü bildirib.
"Bu gün 26 layihə həyata keçirilib. Bu layihələrin həyata keçirilməsi üçün bank 585 milyon dollar ayırıb. Hazırda dəyəri 2,022 milyard dollar olan 24 layihənin həyata keçirilməsi davam edir", - Şərifov deyib.
Bank tərəfindən ayrılan vəsaitlərin 54 faizi nəqliyyat sektoruna, 22 faizi kanalizasiya və su təminatı sahələrinə, 8 faizi ətraf mühitin qorunmasına, 7 faizi sosial sektora, 4 faizi institusional tikinti sahəsinə, 3 faizi isə təhsil və kənd təsərüfatı sahəsinə yönəldilib.
"Son illər ərzində DB-nin Azərbaycan üzrə portfeli 2 dəfədən çox artıb və ölkə uğurla Beynəlxalq Yenidənqurma və İnkişaf Bankının xətti üzrə maliyyələşməyə keçib", - Baş nazirin birinci müavini deyib.
"Hazırda Azərbaycan Avropa və Mərkəzi Asiya regionunda DB portfelinin həcminə görə Türkiyə və Qazaxsıtandan sonra üçüncü yeri tutur, - Şərifov deyib. - Təəccüblü deyil ki, Azərbaycan hökuməti Azərbaycanın sosial-iqtisadi inkişaf perspektivlərinin müəyyənləşdirilməsinə görə məhz DB-nin yüksək vəzifəli şəxsləri ilə məsləhətləşmələr aparır".
Azərbaycan 1992-ci ildən DB-nin üzvüdür. Təkcə 2008-ci ildə bank tərəfindən 13 layihənin maliyyələşdirilməsinə 1,251 milyard dollar yönəldilib. Strategiyanın son iki ilində (2009-2010-cu illər) DB ölkəyə bir milyard dollardan çox vəsait ayırmağa hazır olduğunu bildirib. Bu vəsait artıq kommersiya şərtləri ilə - Beynəlxalq Yenidənqurma və İnkişaf Bankının xətti ilə verilməli idi. Bank 2010-cu ildə də Azərbaycanda layihələrin güzəştli maliyyələşdirilməsinin davamına dair razılıq verib.
Məqalə müəllifi ilə əlaqə ünvanı: [email protected]
