Azərbaycan, Bakı, 26 oktyabr / Trend , müxbir N.İsmayılova/
"Azərbaycan bankları tərəfindən avtokreditlərin verilmə şərtləri sərfəli olaraq qalır", - lider avtomobil istehsalçılarının Azərbaycan nümayəndəliklərindən deyilib. Avtokreditlərin verilmə şərtləri əvvəlki səviyyədə qalır və ya faiz dərəcəsinin azalmasına istiqamətlənib.
"Subaru" avtosalonundan bildiriblər ki, salon Bank Respublika ilə əməkdaşlıq edir və avtomobilin kreditlə alınması ilkin 30 faizlik ödənişlə, maksimal müddəti beş il olmaqla, illik 22 faizlə mümkündür. Əvvəl bank ilkin ödəniş 15 faiz olmaqla dörd il müddətinə, illik 9-19 faizlə kredit verirdi. Salon həmçinin avtomobillərin lizinqə ilkin ödəniş 15 faiz, maksimum dörd il müddətinə illik 19 faizlə verilməsinə də başlayıb.
"Hyundai" avtosalonu Unibank vasitəsilə kredit verir: ilkin ödəniş 25 faiz, maksimum üç il müddətinə, ildə 20 faiz. Əvvəllər salon yalnız Bank of Baku ilə bu şərtlərlə əməkdaşlıq edirdi.
"Nissan" və "Ford" avtosalonları məlumat veriblər ki, onlarda kreditlər NBC Bank vasitəsilə alınır. Şərtlər belədir: ilkin ödəniş 20 faiz, maksimum beş il, ildə 24 faiz. İlkin ödəniş 50 faiz olduqda müştəri qarşıdakı iki il ərzində illik faizlərdən azad edilir.
"Toyota" avtosalonundan bildirdilər ki, hazırda avtomobillərin kreditlə satışı Azerdemiryolbank vasitəsilə aparılır. Şərtlər ilkin ödəniş 30 faiz, maksimum beş il, ildə 22 faiz həddindədir. Əvvəllər isə kreditlər ilkin ödəniş 20 faiz, maksimum üç il, ildə 23 faiz həddində idi.
Məqalə müəllifi ilə əlaqə ünvanı: [email protected]
