Azərbaycan, Bakı, 29 oktyabr / Trend , müxbir İ.Xəlilova/
Azərbaycanın Vergilər Nazirliyində "vahid pəncərə" vasitəsilə UNİCREDİT qeyri-bank kredit təşkilatı dövlət qeydiyyatından keçib, bu barədə nazirlikdən cümə axşamı bildirilib.
Kredit təşkilatının təsisçisi və hüquqi nümayəndəsi qismində fiziki şəxs Azər Babayev çıxış edir.
UNİCREDİT-in nizamnamə kapitalı 20 manat təşkil edir. Kredit təşkilatının ofisi Sumqayıt şəhərində yerləşir.
Azərbaycanda 31 mikromaliyyə təşkilatı fəaliyyət göstərir, onlardan 18-i qeyri-bank kredit təşkilatı (o cümlədən beynəlxalq təşkilatlar tərəfindən təsis edilən 14 QBKT), biri dövlət qeyri-bank kredit təşkilatı "Aqrar kredit", qalanları isə mikromaliyyələşdirmə ilə məşğul olan banklardır. Avqustun 31-ə olan göstəricilərə əsasən, mikromaliyyəşəldirmə təşkilatlarının 270 min müştərisi var, məcmu kredit portfeli 641,8 milyon dollar, mikrokredit portfeli isə 399,6 milyon dollar təşkil edir. Portfeldə riskli kreditlərin payı 3,84 faiz təşkil edir.
Məqalə müəllifi ilə əlaqə ünvanı: [email protected]