Azərbaycan, Bakı, 10 fevral / Trend , müxbir E.İsmayılov/
Bakı metropolitenin dərinenişli stansiyalarında əlavə çıxışların olması təhlükəsizliyin təmin edilməsi baxımından vacibdir. Bunu Bakı Metropoliteninin rəhbəri Tağı Əhmədov çərşənbə günü deyib.
"Yalnız "Elmlər Akademiyası" stansiyasında deyil, dərinenişli bütün stansiyalarda əlavə çıxışlar olmalıdır. Bu, təhlükəsizlik baxımından zəruridir", - Əhmədov deyib.
Xüsusilə də "İçərişəhər", "Sahil", "Nizami" və "Xətai" stansiyalarında əlavə çıxışların tikilməsi planlaşdırılır.
Onun sözlərinə görə, "Elmlər Akademiyası" stansiyasında əlavə çıxışın inşası bu il dövlət investisiya proqramına daxil edilməyib. Əlavə çıxışın istismara verilməsi 2 il müddətində - zəruri vəsaitin ayrılmasından sonra mümkün olacaq.
Əhmədovun sözlərinə görə, "Avtovağzal" stansiyasının inşası üzrə işlər davam edir. İlk növbədə, "Avtovağzal" və "Cavadxan" stansiyalarının daxil olduğu Bakı Metropoliteninin üçüncü xəttinin inşası istismara veriləcək. Bu stansiyaların inşası hələlik təsdiq edilməyən metropolitenin inkişafı proqramında da nəzərdə tutulub.
Bakı Metropoliteni 1967-ci ildən fəaliyyət göstərir və 22 stansiyası var.
