Azərbaycan, Bakı, 31 mart / Trend /
Bazarqan gömrük məntəqəsi vasitəsilə İran ərazisindən əmtəə tranzitinin həcmi ötən il (İranda yeni il mart ayının 21-dən başlayır) 14% artıb. Bunu Bazarqan gömrük məntəqəsinin direktoru Rəhim Qulamiyan deyib. Məlumatı MEHR informasiya agentliyi yayıb.
Onun sözlərinə görə, ötən il Bazarqan gömrük məntəqəsi vasitəsilə tranzitlə 55 min yük avtomobili (artım 17% təşkil edib) və 1 013 129 ton əmtəə (14 faiz artım) keçib.
Qulamiyanın sözlərinə görə, ötən il Bazarqan gömrük məntəqəsindən ümumilikdə 219 min yük avtomobili keçib ki, bunun da 60%-i Türkiyəyə, 35%-i İrana, qalan 4%-i isə digər ölkələrə məxsusdur.
Ötən il gömrük məntəqəsindən 1,5 milyon sərnişin keçib ki, bu da ondan əvvəlki ildəki göstəricidən 37% çoxdur.
Bazarqan gömrük məntəqəsi Qərbi Azərbaycan vilayətində, Türkiyə ilə sərhəddə yerləşən Maku şəhərinin 20 kilometrliyində yerləşir.