Azərbaycan, Bakı, 13 aprel /Trend, müxbir N.İsmayılova/
Dünya valyutasının kursunun dəyişilməsi Azərbaycanın strateji valyuta ehtiyatına təsir etməyib. Bunu Azərbaycan Mərkəzi Bankının (AMB) idarə heyətinin sədri Elman Rüstəmov deyib.
"AMB-in sərəncamında olan ölkənin strateji valyuta ehtiyatı və ölkənin Dövlət Neft Fondu dünya valyutasının rolunu və həmin valyutanın kursunun dəyişilməsi tendensiyasını nəzərə almaqla optimal diversifikasiya olunub, onlar valyutanın kursunun dəyişikliyinə məruz qalmayıblar", - Rüstəmov deyib.
Onun sözlərinə görə, dünya valyutasının dəyişilməsi ilə bağlı proseslər o səviyyədə deyil ki, AMB radikal tədbirlər həyata keçirməyə başlasın.
"Ölkənin strateji valyuta ehtiyatı cari ilin birinci rübünün sonunda 22 milyard dollar təşkil edib və yaxşı diversifikasiya olunmuş struktura malikdir", - o deyib.
Onun sözlərinə görə, AMB-in valyuta ehtiyatının artımı birinci rübdə, həmçinin, Dövlət Neft Fondundan daxil olan 400 milyon dollar hesabına şərtlənib.