Azərbaycan, Bakı, 15 may /Trend, müxbir İ.Xəlilova/
2010-cu ilin yanvar-aprel aylarında Azərbaycanda sənaye istehsalı 9,6 milyard manat təşkil edib ki, bu da 2009-cu ilin analoji dövr göstəricisindən 5,2 faiz çoxdur. Bu barədə şənbə günü Dövlət Statistika Komitəsindən bildirilib.
Hesabat dövrü ərzində hasilat sənayesinin istehsal həcmi 5,1 faiz artaraq 7,47 milyard manat, xüsusi çəkidə isə 77,7 faiz təşkil edib. Emal sənayesinin xüsusi çəkisi 16,4 faiz, elektik enerjisi və qaz sektorunun xüsusi çəkisi 5,4 faiz, su sektorunun xüsusi çəkisi isə 0,5 faiz təşkil edib.
Azərbaycan Beynəlxalq Əməliyyat Şirkəti (ABƏŞ) tərəfindən hesabat dövrü ərzində neft hasilatının həcmi 6 faiz artaraq 13,9 milyon ton, təbii qazın hasilat həcmi isə 6,9 faiz azalaraq 3,7 milyard kubmetr təşkil edib.
Rüb ərzində özəl sektorun payı 4,4 faiz artaraq ümumi sənaye istehsalının 82,2 faizini təşkil edib.
Emal sənayesinin istehsal həcmi 9,9 faiz artaraq 1 577,8 milyon manat təşkil edib. Yanvar-aprel aylarında qida məhsullarının istehsalında da əhəmiyyətli artım müşahidə olunub. Ölkədə makaron istehsalı 10 faiz artaraq 4739,9 ton, ət istehsalı 3,9 faiz (82,1 min ton), süd istehsalı üç faiz (211,9 min ton), kərə yağı 0,9 faiz (7 min ton), cem və mürəbbə 12,4 faiz (2,3 min ton), bitki yağı 16,4 faiz (14,2 min ton) təşkil edib.
Mayın 15-nə olan rəsmi məzənnə 0,8036 AZN/USD təşkil edir.