Аzərbaycan, Bakı, 1 iyun /Trend, müxbir E.İsmayılov/
On gün ərzində Azərbaycanın Nəqliyyat Nazirliyi Biləsuvar rayonunda Araz çayı üzərində 82 metr uzunluğunda yeni körpünün tikintisini başa çatdırmağı planlaşdırır. Bu barədə çərşənbə axşamı Azərbaycanın nəqliyyat naziri Ziya Məmmədov bildirib.
"Araz çayının daşması nəticəsində sellərin yolları dağıtmaması və tikilən körpünün altından müəyyən qaydada keçməsi üçün çayın Biləsuvardan keçən hissəsində 82 metr uzunluğunda körpünün tikintisi üzrə işlər aparılır. İşlərin çox olmasına baxmayaraq, körpünün tikilməsi on gün ərzində başa çatdırılacaq", - Məmmədov deyib.
Son həftələr ərzində Kürün məcradan çıxması və digər çaylarda daşqınlar səbəbindən, 40 rayonun ərazisində subasma halları qeydə alınıb. Bu təbii fəlakət nəticəsində 20 minə yaxın ev su altında qalıb, 300-dən çox ev dağılıb, 2 min ev qəzalı vəziyyətdədir və 76 min hektar əkin və örüş sahələrini su basıb.
Təbii fəlakətin nəticələrinin aradan qaldırılması məqsədilə Bəhramtəpə su qovşağında Araz çayının yeni qolu açılıb.
Nazirin sözlərinə görə, lap əvvəldən nazirlik alternativ yolların bərpası işləri ilə məşğul olub, həmçinin cənub istiqamətində nəqliyyat hərəkətinin təmin olunması üçün lazımi şərait yaradılıb. Bütövlükdə, nazir görülən işlərin nəticələrini müsbət qiymətləndirib.
Onun sözlərinə görə, təbii fəlakət cənub istiqamətində (Bakı-Astara dəmiryolu) dəmiryol nəqliyyatına da öz təsirini göstərib. Bir çox ərazilərdə suyun keçməsini təmin etmək məqsədilə dəmiryol bərpa olunub, nəticədə yaşayış məntəqələri və sakinlərin təhlükəsizliyi təmin olunub.
Həmçinin Məmmədov Biləsuvar rayonunda dəmiryol xəttinin bərpa olunması da istisna etməyib. Bu addım zərurət yarandığı halda atılacaq. "Azərbaycan Dəmir Yolları"QSC-nin rəhbərliyi və əməkdaşları bu gün səhər bu məsələnin yerindəcə həll edilməsi üçün rayona yola düşüblər.
Suyun axınını təmin etmək məqsədilə birinci mərhələdə 1700 millimetr diametri olan 21-ə yaxın boru kəmərinin çəkilməsi planlaşdırılır.
