Azərbaycan, Bakı, 22 iyun /Trend, müxbir N.İsmayılova/
Azərbaycan İnvestisiya Şirkəti (AİŞ) "Azərtoxum" şirkətinin iştirakçı kapitalında 15 faiz pay alıb. Bu pay 2011-ci ilədək 20 faizədək artırılacaq. Bu barədə AİŞ-in icraçı direktoru Əfqan İsayev bildirib.
"Bu, ölkənin kənd təsərrüfatı sektorunun inkişafı üçün əhəmiyyətli layihədir. Layihənin maliyyələşdirilməsində üç struktur - AİŞ, "Azərtoxum" və bir Türkiyə şirkəti iştirak edir", - İsayev deyib.
Onun sözlərinə görə, layihənin ümumi dəyəri 22,4 milyon manat təşkil edir. AİŞ-in iştirak payı isə 4 milyon manatdır. Lakin bu günədək 2,8 milyon mant sərmayə yatırılıb. Qalan hissə isə 2011-ci ilin may ayınadək yatırılacaq.
"Azərtoxum" müsair avadanlıqla təchiz edilən yeni zavoddur", - İsayev qeyd edib.
AİŞ ölkə Prezidentinin 30 mart 2006-cı il tarixli fərmanına əsasən yaradılıb. Şirkətin yeganə təsisçisi qismində Azərbaycanın İqtisadi İnkişaf Nazirliyi çıxış edir. AİŞ-in nizamnamə kapitalı 160 milyon manat təşkil edir.