Azərbaycan, Bakı, 9 iyul /Trend, müxbir Ü.İsmayılova/
"Fitch Ratings" Beynəlxalq Reytinq Agentliyi orta və uzunmüddətli perspektivdə Azərbaycanın bank sektroru üçün risk törədən amilləri müəyyən edib.
"Fitch Ratings"in Moskvadakı ofisinin bank analitik qrupunun direktoru Vladimir Markelov hesab edir ki, dünya maliyyə böhranınadək sürətlə inkişaf etməsinə baxmayaraq, ölkə iqtisadiyyatında Azərbaycanın bank sektorunun xüsusi çəkisi cüzi olaraq qalır.
Azərbaycan bank xidmətlərinin nüfuzetmə göstəricisi üzrə (kreditlər/ ÜDM: 2009-cu ilin sonu üzrə 24 faiz) hələlik bir sıra inkişaf etməkdə olan ölkələrdən, o cümlədən, Türkiyədən (46 faiz), Rusiyadan (43 faiz) geri qalır.
"Azərbaycan bank sektorunun inkişaf səviyyəsinə görə baza xidmətlərinin - qısamüddətli kreditləşmə, hesab-kassa xidmətləri, pulköçürmələri üzrə üstünlükləri ilə xarakterizə olunur. Eyni zamanda, maliyyə bazarının digər sahələrində - səhmlər, istiqrazlar, struktur maliyyələşdirmə, eləcə də bankların iştirak edə biləcəkləri uzunmüddətli - ipoteka, layihə və infrastruktur maliyyələşdirmədə Azərbaycan hələlik zəif inkişaf edib", - Markelov bildirib.
"Fitch" qeyd edir ki, Azərbaycan Mərkəzi Bankı tərəfindən böhran dövründə göstərilmiş və indiyədək ayrı-ayrı banklara və ümumilikdə sistemə göstərilən dəstək onlara davam gətirməyə kömək edib.
Lakin Markelov hesab edir ki, Azərbaycanın bank sistemi əvvəlki kimi korporativ idarəetmənin aşağı səviyyəsi, risklərin idarə olunmasının zəif sistemi ilə xarakterizə olunur. Onun fikrincə, Azərbaycan Beynəlxalq Bankı istisna təşkil edir.
Azərbaycanda 47 bank bank fəaliyyətinin həyata keçirilməsi üzrə lisenziyaya malikdir. 2010-cu il iyunun 1-nə olan məlumata görə, Azərbaycan banklarının ümumi aktivləri 12 milyard manatı keçib.