Azərbaycan, Bakı, 10 iyul /Trend, müxbir N.İsmayılova/
Altı ay ərzində ölkənin Mərkəzi Bankı yanında Azərbaycan İpoteka Fondunun (AİF) xətti ilə 52,1 milyon manat məbləğində kredit verilib. Bu barədə AİF-in məlumatında deyilir.
2010-cu il dövlət büdcəsində ipoteka kreditləşdirilməsinə 14 milyon manat ayırmaq planlaşdırılıb. Bununla yanaşı, İpoteka Fondu 75 milyon manat həcmində istiqrazların yerləşdirilməsinə başlayıb və bu həcmin doqquz milyonu artıq yerləşdirilib.
AİF-in məlumatına əsasən, Azərbaycanda əhalinin adambaşına düşən ipoteka krediti 17,4 manat təşkil edir, 2009-cu ildə bu göstərici 17,05 manat, 2008-ci ildə 7,34 manat, 2007-ci ildə 5,28 manat, 2006-cı ildə isə 0,2 manat təşkil edib.
Gənclərə və gənc ailələrə verilən kreditlərin ümumi həcmi 72 faiz təşkil edir. Kreditlərin 20 faizi 36 yaşından yuxarı şəxslərin payına düşür.
Məlumatda deyilir ki, bu il əhalinin ipoteka kreditlərinə olan tələbatının təmin edilməsinin cari dinamikasının qorunub-saxlanılması planlaşdırılır.
AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir; ipotekanın obyekti yalnız mənzil və şəxsi ev ola bilər; ipoteka kreditləşməsinin məbləği bazar qiymətlərinin 85 faizini keçməməlidir; kredit üzrə aylıq ödəmə borc götürənin aylıq gəlirinin 70 faizini keçməməlidir; həyat sığortasının məbləği ipoteka kreditindən çox olmalıdır və s.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı, üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
AİF 2005-ci ilin dekabr ayında yaradılıb. 2006-cı ilin martından ipoteka kreditlərinin verilməsinə başlanılıb. 2007-ci ilin iyununda fond maliyyə çatışmazlığı ilə əlaqədar kreditin verilməsini dayandırıb. 2009-cu il iyunun 1-dən kreditin verilməsi bərpa edilib.
İyulun 10-da olan rəsmi məzənnə 0,8036 AZN/USD təşkil edir.
