Azərbaycan, Bakı, 29 iyul /Trend, müxbir E.İsmayılov/
Avqustun 15-dən sonra Bakıda nəqliyyatın intellektual idarə edilməsi sisteminin yaradılması çərçivəsində zəruri avadanlığın təchizatı başlayacaq. Bu barədə Azərbaycan Nəqliyyat Nazirliyinin cümə axşamı yaydığı məlumatda deyilir.
Məlumatda qeyd olunduğuna görə, layihə çərçivəsində zəruri avadanlığın yaradılması prosesi başaçatma mərhələsindədir və avadanlıq alınandan sonra onun quraşdırılması prosesi başlayacaq.
"Nəqliyyatın intellektual idarə edilməsi sisteminin yaradılması prosesi gələn ilin fevralında başa çatacaq. Sistem Bakıda sərnişin nəqliyyatının tənzimlənməsi və idarə edilməsi məqsədilə yaradılır. Nəqliyyatın intellektual idarə edilməsi sistemi üzrə mərkəzin inşası ilə bağlı işlərin cari ilin sonuna başa çatdırılması planlaşdırılıb. Mərkəzin inşası üzrə işlər ötən il başlayıb", - nazirliyin mətbuat katibi Namiq Həsənov əvvəllər deyib.
Layihənin dəyəri 77 milyon dollardır.
Sistem çərçivəsində avtobus dayanacaqları üçün 639 meydanın, 140 taksi dayanacağının yaradılması planlaşdırılıb. Artıq 375 yeni dayanacaq yaradılıb, 289 dayanacağın quraşdırılması, 42 dayanacağın yerinin dəyişdirilməsi planlaşdırılıb, 10 dayanacaq isə ləğv ediləcək. Bu işlər intellektual sistemin yaradılması prosesində iştirak edən yol polisi və koreyalı mütəxəssislərlə birgə aparılır.
Bakıda şəhərin intellektual sisteminin yaradılması çərçivəsində təxminən 450 yeni tipli avtobus dayanacağının quraşdırılması planlaşdırılır. Bu dayanacaqlarda elektron tablolar quraşdırılacaq və bu tablolar avtobusların hərəkət və marşrutlarını müşahidə etməyə imkan verəcək. Həmçinin, dayanacaqlarda quraşdırılacaq tablo və kameraların köməyi ilə dayanacaqların yerləşmə effektivliyinin, onun zəruriliyi və əhali tərəfindən istifadəsinin monitorinqi aparılacaq. İntellektual sistem təxminən 150 yeni elektron tipli işıqforun quraşdırılmasını nəzərdə tutur.