Azərbaycan, Bakı, 3 avqust /Trend, müxbir N.İsmayılov/
Dünya Bankının (DB) Direktorlar Şurası Azərbaycan üzrə dörd ilə nəzərdə tutulan əməkdaşlıq haqqında yeni strategiyanın (Country Partnership Strategy) qəbul edilməsi məsələsinə oktyabrın 19-da baxacaq. Bu barədə çərşənbə axşamı bankın Bakı nümayəndəliyindən bildiriblər.
Bank artıq hökumət, parlament və vətəndaş cəmiyyəti ilə məsləhətləşmələr aparıb və hazırda şərhlərin alınması prosesindədir.
"Azərbaycan hökumətinə baxılmağa verilən sənədin ilkin layihəsi artıq hazırdır və avqust ayı ərzində onunla bağlı şərhlər alınacaq", - nümayəndəlikdən bildiriblər.
Nümayəndəlikdən verilən məlumata görə, sentyabrda sənədin artıq son variantı hazırlanacaq və baxılması üçün oktyabrın 19-da bankın Direktorlar Şurasına təqdim ediləcək.
Strategiya çərçivəsində bank ölkəyə layihələrin maliyyələşdirilməsinə ümumilikdə 250 milyon dolları ayırmağı planlaşdırıb. Dörd il ərzində DB orta hesabla bir milyard dollar verməyə ümid edir.
Bankın əsas ideyası yol tikintisi sahəsində, aqrosənayenin inkişafında uğurlu layihələri davam etdirməkdən ibarətdir.
Bank ekologiya və təhsil sahəsində ən azı beş layihəni təsdiqləməyə hazırlaşır, kiçik şəhərlərin siyahısını artırmaqla, su təchizatı və kanalizasiya sistemlərinin yaxşılaşdırılması üzrə layihələrin davam etdirilməsi mümkündür.
1992-ci ildə ölkə DB-yə üzv olan zaman bank Azərbaycan hökuməti ilə əməkdaşlığa başlayıb və indiyədək 2,7 milyard dollar məbləğində 52 layihəni maliyyələşdirib. Bu vəsaitlərin indiyədək yalnız 1,5 milyar dollarından istifadə olunub.