...

AİB Azərbaycanın qərbində tranzit daşımalarının yaxşılaşmasına investisiya yatırır

Biznes və iqtisadiyyat xəbərləri Materials 5 Avqust 2010 18:32 (UTC +04:00)

Azərbaycan, Bakı, 5 avqust /Trend, müxbir İ.Xəlilova/

Gəncə dairəvi yolunun podratçısı seçilən İtaliyanın "Impresa S.P.A." şirkəti Asiya İnkişaf Bankının və Azərbaycan hökumətinin kreditləri hesabına həyata keçirilən tikinti işlərinin hazırlığına başlayıb. Bu barədə cümə axşamı bankın Bakı nümayəndəliyindən bildiriblər.

"Yolun yenidən qurulmasına qoyulan investisiyalar ticarət, transsərhəd və tranzit daşımalarını asanlaşdırmağa imkan verəcək, belə ki, avtomobil yolları şəbəkəsinin təkmilləşdirilməsi, trafikin artırılması, eləcə də ticarətin genişlənməsi Azərbaycanın qərbində sosial-iqtisadi inkişafın tezləşməsinə və Gürcüstanla əməkdaşlığa təsir göstərəcək", - bankda belə hesab edirlər.

Layihə çərçivəsində yolun ikizolaqlı qalacağı planlaşdırılıb.

Gəncə dairəvi yolunun yenidən qurulması layihəsinin ümumi dəyəri 73,9 milyon dollar təşkil edir. Bundan 55,4 milyon dollar AİB-in krediti qismində təqdim ediləcək, qalan 18,5 milyon dollar isə Azərbaycan hökumətinin payına düşür.

Yolun uzunluğu 39 kilometr təşkil edir. Yolun bu hissəsi Yevlax-Gəncə və Qazax-Gürcüstan sərhədi şərq-qərb avtomagistralının hissəsinin yenidən qurulması layihəsinə daxildir. Bu layihənin də maliyyələşməsinə AİB-in vəsaitləri cəlb edilib, lakin onun bahalaşması ilə əlaqədar əlavə maliyyələşmə tələb olunub. Həmin vəsait Azərbaycanın yol layihələri üçün qalan multitranş paketin (Multitranche Financing Facility - MFF) vəsaitlərinin qalığından verilib. Onun həcmi 2007-ci ilin avqustunda 500 milyon dollar məbləğində təsdiq edilib.

Uzunluğu 88,8 km olan birinci hissə - Yevlax-Gəncə yolunun ümumi dəyəri 58,7 milyon dollar təşkil edir. Bunun 10,4 milyon dolları İslam İnkişaf Bankının, 11 milyon dolları Səudiyyə İnkişaf Fondunun, 24 milyon dolları AİB-in, 13,3 milyon dolları isə Azərbaycan hökumətinin payına düşür. Uzunluğu 38,8 km olan ikinci sahə - Qazax-Gürcüstan sərhədi 30 milyon dollar məbləğində qiymətləndirilir. Bu, AİB-in 28 milyon dollar həcmində krediti və Azərbaycanın payı (2 milyon dollar) hesabına maliyyələşdiriləcək.

Asiya bankının multitranş paketindən indiyədək Masallı-Astara yolunun yenidən qurulmasına 200 milyon ayrılması təsdiqlənib. MFF paketinin 2014-cü ilədək mənimsənilməsi nəzərdə tutulur.

Xəbər lenti

Xəbər lenti