Azərbaycan, Bakı, 6 avqust /Trend, müxbir Ü.İsmayılova/
Əvvəllər ləğv edilmiş birgə İran-Azərbaycan "Azər-Asiya" Sığorta Şirkətinin iranlı təsisçiləri Azərbaycanın Dövlət Sığorta Nəzarəti Xidmətinə yeni 100 faizlik xarici şirkət üçün sığorta fəaliyyəti göstərməklə bağlı lisenziya almağa dair müraciət edə bilərlər. Bu barədə cümə günü Maliyyə Nazirliyi Dövlət Sığorta Nəzarəti Xidmətinin rəhbəri Namiq Xəlilov bildirib.
Əvvəllər ləğv edilmiş birgə İran-Azərbaycan "Azər-Asiya" Sığorta Şirkətinin ("Azərsığorta" Dövlət Kommersiya SŞ) azərbaycanlı səhmdarları öz paylarını (51 faiz) İranın "Asiya" Sığorta SŞ-nə (49 faiz) satıblar. Bu barədə bir az əvvəl "Azərsığorta" Şirkətinin sədr müavini Aftandil Hacıyev bildirib. Şirkətin Azərbaycana məxsus payının satışı barədə qərar iyunda keçirilən ümumi iclasda qəbul edilib.
"Hələlik DSNX-ə iranlı səhmdarlar tərəfindən belə müraciət daxil olmayıb", - Xəlilov deyib.
Onun sözlərinə görə, iranlı səhmdarlar bütün lazımi sənədləri Azərbaycanın sığorta qanunvericiliyinə uyğun təqdim edə bilsələr, onda İran şirkətinə lisenziya verilə bilər.
"Lakin əvvəllər aşkar olunan pozuntulara görə, "Azər-Asiya" birgə sığorta şirkətinin lisenziyasının bərpasından söhbət belə gedə bilməz", - DSNX-nin rəhbəri bildirib.
Azərbaycanın səhmlərinin satış prosesi artıq tam başa çatıb, yalnız yaxın vaxtlarda həll olunacaq bir neçə məsələ qalıb. "Azərsığorta" şirkətinin sədr müavininin sözlərinə görə, "Azər-Asiya" Şirkəti səhmdar cəmiyyət kimi öz statusunu saxlayır və onun 100 faizlik İran şirkəti kimi fəaliyyətini bərpa edəcəyi istisna olunmur.
"Şirkətin Azərbaycanda başqa biznes reallaşdırması da mümkündür", - Hacıyev bildirib.
Maliyyə Nazirliyi hələ 2008-ci ildə "Azər-Asiya" birgə sığorta şirkətinə 2002-ci il noyabrın 21-də verilmiş fəaliyyət lisenziyasının müddətinin uzadılmasından imtina edib. Müddətin uzadılmasından imtina edilməsinə səbəb, şirkətin 2006-cı il oktyabrın 1-dən 2007-ci il oktyabrın 1-dək dövrdəki sığorta qanunvericiliyinə və lisenziyanın tələblərinə uyğunluq üzrə fəaliyyətinin analizinin nəticələri səbəb olub. Yoxlamalar zamanı pozuntu faktları aşkar olunub.
Bu qərarın açıqlanmasından sonra, şirkət müqavilənin şərtlərini dəyişmədən öz portfelini BE&G şirkətinə verib. Həmin anda şirkətin 17 minə yaxın fiziki və 60-a yaxın korporativ müştərisi olub.
"Azər-Asiya" birgə sığorta şirkəti Azərbaycanın sığorta bazarında 1997-ci ildən fəaliyyət göstərib.
