Azərbaycan, Bakı, 25 avqust /Trend, müxbir E.İsmayılov/
TRACEKA (Avropa-Qafqaz-Asiya) nəqliyyat dəhlizinin hökumətlərarası komissiyasının daimi katibliyinin növbəti iclası oktyabrın 12-də Brüsseldə keçiriləcək birinci investisiya forumuna və oktyabrın 13-də elə oradaca keçiriləcək hökumətlərarası illik komissiyanın səkkizinci konfransına bütün zəruri bazanı hazırlayacaq. Bu barədə çərşənbə günü TRACEKA-nın Azərbaycandan olan milli katibi Akif Mustafayev deyib.
Onun sölzərinə görə, Kiyevdə müzakirəsi planlaşdırılan əsas məsələlər islahat mövzuları, gələcək layihələr və Brüsseldə keçiriləcək foruma və konfransa hazırlıqdır. İclasda üzvlük haqları, gələcək illər üçün büdcə məsələləri kimi ənənəvi məsələlərin müzakirəsi planlaşdırılıb.
Mustafayevin dediyinə görə, Kiyevdə keçiriləcək iclasda səkkizinci konfransda və investisiya forumunda müzakirəyə çıxarılan məsələlər qəti olaraq təsdiq ediləcək.
"Buna baxmayaraq, oktyabrın 11-də milli katiblər səviyyəsində bütün məsələlər bir daha nəzərdən keçiriləcək və razılaşdırılacaq", - Mustafayev bildirib. Bu, onunla əlaqədardır ki, Kiyev görüşünün yekunları bütün iştirakçı ölkələrə göndəriləcək, milli katiblərin görüşü isə yaranan sualların və dəyişikliklərin dəqiqləşdirilməsi və razılaşdırılması məqsədilə keçiriləcək.
İnvestisiya forumuna təqdim edilən layihələrin arasında Bakı şəhərinin Ələt qəsəbəsində tikiləcək beynəlxalq dəniz limanında logistika mərkəzinin yaradılma layihəsi də var.
Hazırda TRACEKA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İrandır.