Аzərbaycan, Bakı, 27 avqust /Trend, müxbir А.Axundov/
Azərbaycanda həyat sığortası üzrə yeganə sığorta şirkəti "Atəşgah Həyat" 2010-cu ilin sonuna qədər 1,4 milyon manat yığmağı planlaşdırır. Bu barədə cümə günü Trend-ə şirkətin idarə heyətinin sədri Aytən Hüseynova bildirib.
"2010-cu ilin sonuna qədər 1,4 milyon manat yığmağı planlaşdırıq. Düşünürəm ki, planlar kifayət qədər realdır və həyata keçirilməsi mümkündür", - o deyib.
Hüseynovanın sözlərinə görə, 2009-cu ildə şirkət 500 min manata yaxın toplayıb, 2010-cu ilin ilk yeddi ayında isə yığılmış sığorta haqlarının həcmi 600 min manat təşkil edib.
İdarə heyəti sədrinin bildirdiyi kimi, növbəti il şirkətin nizamnamə kapitalının artırılması planlaşdırılır.
"Atəşgah Həyat" sığorta şirkətinin nizamnamə kapitalı bu günə 2,3 milyon manat təşkil edir. Növbəti il artım planlaşdırılır", - Aytən Hüseynova bildirib.
2009-cu ildə yeni qanunvericiliyə müvafiq olaraq "Atəşgah" şirkətlər qrupu həyat sığortası üzrə fəaliyyət göstərmək üçün ixtisaslaşdırılmış şirkət təsis edib. Beləliklə, "Atəşgah Həyat" sığorta şirkəti Azərbaycanda həyat sığortası ilə məşğul olan ilk və yeganə şirkətdir. Şirkətin səhmdarları I.S.R. Holding Ltd. və RAN-EXIM şirkətidir.