Azərbaycan, Bakı, 4 sentyabr /Trend, müxbir А.Axundov/
Turistlər üçün istehlak kreditləri təqdim edən bankların siyahısı genişlənir. Bu barədə şənbə günü Trend-ə Azərbaycan Turizm Agentlikləri Assosiasiyasının sədri Nahid Bağırov deyib.
"Banklar artıq başa düşüb ki, turizm putyovkalarına kreditlərin verilməsi əlverişli prosesə çevrilib. Bu gün bu proses aktualdır. Bütün banklar bununla maraqlanır. Bizə hər gün yeni təkliflər gəlir", - Bağırov deyib.
Onun sözlərinə görə, bu cür kreditləri verən ən fəal bank "Bank of Baku", həmçinin, "DəmirBank" və "BTB Bank"dır.
"BTB Bank" fəal şəkildə kreditlər verməyə başlayıb. Demək olar ki, bu gün onların daha əlverişli şərtləri var", - Bağırov deyib.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. İdarə heyəti üzvlərinə "Improtex Travel", "Caspian Travel", "Pasha Travel", "Silkway Travel", "Euroturizm" şirkətlərinin rəhbərləri daxildir. Bu gün 51 turizm şirkəti assosiasiyanın üzvüdür.
Assosiasiyanın əsas fəaliyyət istiqamətləri:
- turizm şirkətlərinin maraqlarının qorunması;
- qanun layihələrinin işlənib-hazırlanması, milli turizm şirkətinin yaradılmasına yardım;
- bazar iştirakçıları üçün təlim və seminarların keçirilməsi üzrə plan hazırlanması;
- Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması;
- daxili turizmin inkişafı və dünya bazarında turizm məhsullarının təqdim olunması.
Fəaliyyət istiqamətlərinə, həmçinin:
- konqres turizminin inkişafı və tətbiqi;
- idarəetmə və xidmət sahəsində peşəkar kadrların hazırlanmasına yardım;
- turizm sahəsində adekvat vergi qoyuluşunun yaradılması və normativ nizamlamalar;
- standartlaşdırma, sertifikatlaşdırma və lisenziyalaşdırmanın inkişafına yardım;
- beynəlxalq turizm şirkətləri ilə əməkdaşlıq;
- rəsmi nəşriyyat orqanının yaradılması;
- hüquqi məsləhətləşmələr sahəsində xidmətlər;
- normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq
daxildir.
