Azərbaycan, Bakı, 14 sentyabr /Trend, müxbir İ.Xəlilova/
2010-cu ilin birinci yarısının yekunlarına görə özəl sektora birbaşa dövlət və dövlətin zəmanətli kreditləri və digər investisiyalar formasında cəlb olunmuş sərmayələrin xüsusi çəkisi xarici kapitalın strukturunda 2,3 dəfə artaraq 61,3 faiz təşkil edib. Bu barədə ölkənin Mərkəzi Bankının çərşənbə axşamı yaydığı ödəniş balansında deyilir.
Onların ümumi həcmi 2009-cu ilin analoji dövrü ilə müqayisədə 2,3 dəfə artaraq 2309,4 milyon dollar təşkil edib.
"Belə artım əsasən neft-qaz sektoru və banklar tərəfindən cəlb edilmiş kreditlər hesabına olub", - məlumatda qeyd olunub.
Dövlət zəmanəti və birbaşa dövlət tərəfindən 321,5 milyon dollar (13,9 faiz) məbləğində beynəlxalq maliyyə və digər təşkilatların kreditləri cəlb edilərək 48,8 faiz artıb.
Dövlət təminatı olmayan kreditlərin payına 53,4 faiz düşür (1233,8 milyon dollar). Onların həcmi ötən ilin analoji göstəricisi ilə müqayisədə 3,5 dəfə artıb.
Hesabat dövründə banklar tərəfindən 4,6 dəfə artımla 955,8 milyon dollar məbləğində xarici borc cəlb edilib. Neft-qaz sektoru dövlət zəmanəti olmadan 179,1 milyon dollar borc götürüb. Bu göstərici 2009-cu ilin birinci yarısının yekunlarına görə 33,8 milyon dollar olub. Digər müəssisə və firmalar tərəfindən 98,9 milyon dollar (107 milyon dollar) məbləğində kredit alınıb.
Ölkə iqtisadiyyatına cəlb edilən xarici kapitalın ümumi həcmi 1,5 dəfə artraq 3,8 milyard dollar təşkil edib. Bu göstərici birbaşa kreditlərin və xarici kreditlərin cəlb edilməsi sayəsində formalaşıb.