...

Dövlət Sığorta Nəzarəti Xidməti Azərbaycandakı sığorta şirkətlərinin kapitallaşdırılma qrafikində dəyişikliklər etməyə hazırdır

Biznes və iqtisadiyyat xəbərləri Materials 18 Sentyabr 2010 13:31 (UTC +04:00)

Trend-i buradan izləyin

Azərbaycan, Bakı, 18 sentyabr /Trend, müxbir İ.Xəlilova/

Azərbaycan Sığortaçılar Assosiasiyası ölkənin Maliyyə Nazirliyinə Azərbaycandakı sığorta şirkətlərinin kapitallaşdırılması qrafikində dəyişikliklər haqqında təkliflə müraciət edib. Həmin qrafikə görə, 2011-ci il yanvarın 1-nə olan vəziyyətə görə, ümumi kapitalın minimum məbləği 3,5 milyon manat təşkil etməlidir. Bu barədə şənbə günü Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov məlumat verib. Sığortaçılar kapitalın bu səviyyəyə çatdırılma müddətini 2013-cü ilədək təxirə salmağı təklif edirlər.

"Assosiasiya kapitallaşmanın qrafikinə dəyişikliklər etməyi təklif edir, eləcə də lisenziyalaşdırma və investisiyalaşdırma üzrə məsələlər də var", - Xəlilov bildirib. - "Hazırda biz bu təklifə baxır və hesab edirik ki, bu məsələlər üzrə hansısa formada dəyişikliklər etməyə ehtiyac var".

Xəlilov bildirib ki, DSNX bu məsələlərlə bağlı daha konservativ mövqe tutur.

"Biz hesab edirik ki, bunun əsası var. Çünki normativlər müəyyən ediləndə və kapitallaşdırma qrafiki təsdiqlənəndə, sığorta bazarı böyük templərlə inkişaf edirdi", - DSNX-nin rəhbəri bildirib. - "Yüksək artım templəri zamanı sığorta şirkətlərinin risklərdən qaçmaq üçün möhkəm mənbəyi olmalıdır. Həmin məqamda bu, düzgün idi və özünü doğrultmuşdu".

Onun sözlərinə görə, indi başqa vəziyyət müşahidə olunur. Ona görə də sərt yanaşma zərurəti aradan qalxır və bu mərhələdə müəyyən tələbləri azaltmaq və ya onlardan bəzilərini ixtisara salmaq mümkündür.

"Çox güman ki, 2010-cu ilin sonunadək müəyyən tələblər qəbul olunacaq", - Xəlilov deyib.

DSNX-nin rəhbəri 2011-ci ilin əvvəlinədək ümumi kapitalın minimum məbləğinin normativə nisbətdə nə qədər azaldıla biləcəyini deməyib.

Sığorta şirkətlərinin məcmu kapitallarına dair təsdiqlənmiş minimum tələblərə görə, 2010-cu il yanvarın 1-dən sığorta şirkətlərinin kapitalı 2 mln manata, təkrar sığorta şirkətlərininki 4 milyon manata, 2011-ci il yanvarın 1-dən, müvafiq olaraq, 3,5 milyon manata və 7 milyon manata, 2012-ci il yanvarın 1-dən, müvafiq olaraq, 5 milyon manata və 10 milyon manata çatdırılmalıdır.

Xəlilov investisiya yatırımlarının diversifikasiyası üzrə normativlərə yenidən baxılması planları barədə də xatırladıb.

Azərbaycanda 28 sığorta və bir təkrar sığorta şirkəti fəaliyyət göstərir. Yanvar-iyun ayalrı ərzində şirkətlərin tədiyələrinin ümumi həcmi ötən ilin analoji dövrü ilə müqayisədə 21,64 faiz (2009-cu ilin yanvar-iyulunda tədiyələr 113,02 milyon manat səviyyəsində olub), ödəmələr 8,15 faiz (29,19 milyon manat) azalıb.

Sentyabrın 18-nə rəsmi məzənnə 0,8033 AZN/USD təşkil edir.

Xəbər lenti

Xəbər lenti