Azərbaycan, Bakı, 23 sentyabr /Trend, müxbir N.İsmayılova/
Azərbaycanın ilk pul köçürmələri sistemi "Caspian Money Transfer"ə ölkənin daha iki bankı AccessBank və NBC Bank qoşulub. Bu barədə cümə axşamı bu sistemin yaradıcısı "Zaminbank"dan bildiriblər. İndiyə qədər bu sistemə 20 bank - Texnikabank, Parabank, AtraBank, MuğanBank, Bank Standard, Azərbaycan Kredit Bankı, RoyalBank, RabitəBank, Azərbaycan Sənaye Bankı, DəmirBank, Kapital Bank, Bank Silk Way, United Credit Bank, Bank of Baku, Bank Avrasiya, Gəncəbank, Bank Nikoil, Unibank, Express Bank və AGBank qoşulub.
"Zaminbank" "Caspian Money Transfer" sisteminin əhatə dairəsinin genişləndirilməsi məqsədilə ona daha iki bankı - AccessBank və NBC Bank-ı qoşub. Bank "Caspian Money Transfer" sisteminin xidmətlərinin keyfiyyətinin yaxşılaşdırılamsı üzrə işləri də davam etdirir", - "Zaminbank"dan bildiriblər.
Azərbaycanda sistemin fərqləndirici cəhəti odur ki, "Caspian Money Transfer"də köçürülmə üçün minimal faiz 1,5 faiz təşkil edir və köçürülmənin yerinə yetirilməsi iki-üç dəqiqə aparır, alıcıdan isə faiz tutulmur. Digər beynəlxalq ödəniş sistemləri vasitəsilə köçürmələr üçün standart faizlər əksər hallarda 2,5 - 3 faiz təşkil edir.
"Zaminbank" Azərbaycanda ilk pul köçürmələri sisteminin yaradıcısıdır. İndiyədək "Caspian Money Transfer"in fəaliyyət dairəsi Rusiya, Böyük Britaniya, Türkiyə, İspaniya, İtaliya, Yunanıstan, Ukrayna, Litva, Belarus, Moldova, Gürcüstan, Özbəkistan, Tacikistan, Qazaxıstan və Qırğızıstana yayılır.
