Azərbaycan, Bakı, 12 oktyabr /Trend/
Azərbaycanda yeni beynəlxalq dəniz ticarət limanının (Ələt qəsəbəsində) tikintisinin 2013-cü ilədək başa çatdırılması planlaşdırılır. Bu barədə Azərbaycanın nəqliyyat naziri Ziya Məmmədov "Strateji tərəfdaşlıq 1520: Qafqaz regionu" beynəlxalq regional biznes forumu çərçivəsində bildirib.
Onun sözlərinə görə, yeni limanın tikintisi layihəsi 2010-2013-cü illəri əhatə edir.
"2015-ci ilədək yeni liman ildə 15 milyon ton yük qəbul edə biləcək", - nazir deyib.
Onun sözlərinə görə, hazırda Azərbaycanda nəqliyyat sektorunun bütün istiqamətlərinin inkişafına böyük diqqət ayrılır. Həm yerli əhəmiyyətli, həm də iri beynəlxalq nəqliyyat dəhlizlərinin bir hissəsi olan magistral avtomobil yollarının yenidən qurulması və inşası istiqamətində irimiqyaslı işlər aparılır.
Yolların yenidən qurulması və inşası ilə yanaşı, körpülərin, keçidlərin və avtomobil yolları infrastrukturunun digər elementlərinin salınması üzrə işlər görülür.
Azərbaycan, həmçinin, Rusiya, Azərbaycan və İranın dəmiryol sistemlərinin birləşdirilməsini nəzərdə tutan "Şimal-Cənub" dəmiryol layihəsində də fəal iştirak edir.