Azərbaycan, Bakı, 12 oktyabr /Trend, müxbir İ.Xəlilova/
Azərbaycan iqtisadiyyatının bütün sahələrində gələcəkdə də dinamik sosial-iqtisadi inkişafın təmini üçün potensial imkanlar var. Bu barədə çərşənbə axşamı Milli Məclisin plenar iclasında 2011-ci il Dövlət Büdcəsi layihəsinin müzakirəsində iqtisadi inkişaf naziri Şahin Mustafayev deyib.
"Proqnozlara əsasən, iqtisadi artım sürəti 3,8 faiz səviyyəsində gözlənilir və ÜDM-nin nominal dəyəri 40,2 milyard manat həcmində proqnozlaşdırılır", - nazir deyib.
2014-cü ilə qədər ortamüddətli iqtisadi artım 7 faiz səviyyəsində proqnozlaşdırılır.
2011-ci ildə adambaşına düşən ÜDM 5 540 dollar səviyyəsində proqnozlaşdırılır.
"2014-cü ildə adambaşına düşən ÜDM-nin 7 100 dollara çatması nəticəsində, Azərbaycan ölkələr arasında yüksək orta gəlir səviyyəsinə görə öz mövqeyini möhkəmləndirəcək", - nazir deyib.
Gələn il inflyasiyanın artım sürəti beş faiz səviyyəsində gözlənilir, milli valyuta məzənnəsi dollara nisbətdə 0,804 manat təşkil edəcək. Beynəlxalq təşkilatlar və neft hasil edən ölkələrin proqnozlarına görə, Dövlət Büdcəsində neftin qiyməti $60 /barel səviyyəsindədir.
