Azərbaycan, Bakı, 13 oktyabr /Trend, müxbir A.Axundov/
Azərbaycanda məcburi sosial sığortanın dərəcəsi hazırkı 25 faizdən 35 faizədək artırıla bilər. Bunun pensiya-sığorta sistemi çərçivəsində edilməsi nəzərdə tutulub. Bu barədə Dövlət Sosial Müdafiə Fondunun (DSMF) sədri Səlim Müslümüov çərşənbə günü məlumat verib.
"Azərbaycanda yeni pensiya-sığorta sisteminin ilk iki mərhələsinin həyata keçirilməsi üçün məcburi sığorta dərəcəsinin hazırkı 25 faizdən 35 faizədək artırılması vacibdir", - Müslümov bildirib.
Onun sözlərinə görə, dərəcələrin artırılması zamanı ağırlığın əsas hissəsi işçilərin üzərinə düşəcək.
"Əlavə ödəmələrin böyük hissəsi işçilər tərəfindən həyata keçirilməlidir. Təbii ki, işəgötürənlərin də müəyyən hissə ödəməsi lazım gələcək", - Müslümov bildirib.
Azərbaycan Avropa Sosial Xartiyasının üzvü kimi, orta aylıq pensiyaları orta aylıq əmək haqqının 40 faizi səviyyəsinədək artırmalıdır. "Belə səviyyəni məcburi sosial sığortanın 31 faizlik dərəcəsi zamanı təmin etmək mümkündür. Bunun üçün dövlət büdcəsindən transfertlərin həcmini də artırmaq lazımdır", - Müslümov bildirib.
Onun sözlərinə görə, indiki 25 faizlik dərəcələr pensiyaların səviyyəsini orta aylıq əmək haqqının 34 faizi həcmində təmin edir.
Hazırda məcburi sosial sığortadan ayırmaların dərəcələri iki mənbədən formalaşır. İşəgötürənlər əmək haqqı fondunun 22 faizi məbləğində sosial sığorta ayırmaları həyata keçirirlər, işçinin əmək haqqından isə 3 faiz tutulur. Minimum əmək haqqı 85 manat təşkil edir.
2008-ci ildən hüquqi şəxs yaratmadan sahibkarlıq fəaliyyəti həyata keçirən şəxslər üçün mıcburi sosial sığorta üzrə ayırmaların dərəcəsi azaldılıb və torpaq sahibləri üçün vahid dərəcə tətbiq edilib."Sosial sığorta haqqında" qüvvədə olan qanuna görə, ticarət, nəqliyyat, inşaatla məşğul olan fərdi sahibkarlar hər ay məcburi sığortaya göstərilən dövrdəki minimum əmək haqqından 70 faizə qarşı 50 faiz, fəaliyyətin digər sahələrində isə 20 faiz (40 faiz) ayırmalar həyata keçirirlər.
Ailəvi kənd təsərrüfatı işçiləri üçün minimum əmək haqqının 6 faizi həcmində dərəcə tətbiq edilib.
Oktyabrın 13-də rəsmi məzənnə 0,8018 AZN/USD təşkil edir.
