Azərbaycan, Bakı, 29 oktyabr /Trend, müxbir E.İsmayılov/
Azərbaycan, Gürcüstan və Türkiyənin dəmiryol sistemini birləşdirəcək Bakı-Tbilisi-Qars dəmir yolunun tikintisi çərçivəsində işlərin 2012-ci ilin birinci yarısında başa çatdırılması planlaşdırılıb. Bu barədə cümə günü Trend-ə Azərbaycanın nəqliyyat naziri Ziya Məmmədov bildirib.
"Bu layihə çərçivəsində işlər intensiv gedir, heç bir problem yoxdur. Bütün işlər yüksək səviyyədə yerinə yetirilir", - Məmmədov bildirib.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi də planlaşdırılır. Bunun 76 km-i Türkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda 183 km-lik Axalkalaki-Marabda-Tbilisi dəmir yolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.
Bundan əvvəl Azərbaycanın nəqliyyat naziri Ziya Məmmədovun verdiyi məlumata görə, tikinti işlərinin 2012-ci ilin birinci yarısında başa çatdırılması planlaşdırılıb. Lakin layihənin həyatakeçirilmə müddətinin razılaşdırılmasına baxmayaraq, tərəflər prosesin sürətləndirilməsi və işlərin böyük hissəsinin 2011-ci ilin sonunadək başa çatdırılması üzərində işləyirlər.
Dəhlizin yüksək buraxılış qabiliyyəti 17 milyon ton yük təşkil edəcək. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.