Azərbaycan, Bakı, 17 noyabr /Trend, müxbir А.Axundov/
Yanvar-oktyabr aylarında Azərbaycanda faktiki qiymətlər üzrə kənd təsərrüfatı məhsullarının ümumi dəyəri 3,162 milyard manat təşkil edib ki, bu da ötən ilin analoji dövr göstəricisindən 3,8 faiz azdır. Bu barədə Azərbaycan Dövlət Statistika Komitəsindən məlumat verilib.
Ümumilikdə illik hesablamalarda kənd təsərrüfatı istehsalı 3,6 faiz aşağı düşüb.
Faktiki qiymətlər üzrə bitkiçilik məhsullarının dəyəri il ərzində 10,1 faiz azalıb, heyvandarlıq məhsulları isə 6,4 faiz artıb.
Bu dövr ərzində faktiki qiymətlər üzrə meşə təsərrüfatı mallarının dəyəri ötən ilin 1345,8 min manatlıq göstəricisinə nisbətdə 1491,9 min manat, balıq təsərrüfatı məhsullarının dəyəri isə 2009-cu ildə qeydə alınan 111,5 min manata nisbətdə 103,8 min manat təşkil edib.
Kənd təsərrüfatı müəssisələrində fəaliyyət göstərən işçilərin orta əməkhaqları il ərzində 15,6 faiz artaraq 150,9 manat olub.
Noyabrın 17-nə olan rəsmi məzənnə 0,7999 AZN/USD təşkil edir.
