Azərbaycan, Bakı, 7 dekabr /Trend, müxbir İ.Xəlilova/
"ABB-Moskva" MMC regional şəbəkə, Moskva şəbəkəsi və yeni fəaliyyət istiqamətlərinin genişləndirilməsi hesabına Rusiyanın ən böyük bankı olmağı planlaşdırır. Bu barədə çərşənbə axşamı Trend-ə bankın idarə heyətinin sədri Fuad Abdullayev deyib.
"Bu günə bankın filialları Rusiyanın üç regionunda açılıb - Moskva, Sankt-Peterburq və Yekaterinburq. Bankın 2010-2015-ci illər üçün nəzərdə tutulmuş yeni strategiyası üzrə "ABB-Moskva" daha üç regionda təqdim olunmalıdır. Bu regionlardan biri Nijni Novqoroddur. Qalan iki region isə hələ ki müzakirə obyekti olaraq qalır", - Abdullayev bildirib.
Bankın filial şəbəkəsinin yeni genişlənmə proqramı ofislərin bir neçə növünün inkişafını nəzərdə tutur: filial, universal ofis və mini-ofis. Abdullayevin sözlərinə görə, universal ofisin ətrafında 5-6 mini-ofisdən ibarət xüsusi funksional şəbəkə (bankomatlı köşk, əməliyyat kassası və ya ticarət mərkəzində ofis) yaradılacaq ki, bu da şəhərlərin aparıcı rayonlarını əhatə edəcək.
"ABB-Moskva" Azərbaycan Beynəlxalq Bankının törəmə strukturudur, yüz faizlik Azərbaycan kapitalı ilə 2002-ci ildən Rusiya ərazisində fəaliyyət göstərən ilk və yeganə bankdır. Bu günə bankın nizamnamə kapitalı 1,5 milyard rubl təşkil edir. ABB-Moskvanın ümumi portfeli təxminən 5 milyard rubldur.
