Azərbaycan, Bakı, 10 dekabr /Trend, müxbir E.İsmayılov/
Azərbaycan hökuməti gələn ilin ikinci yarısında Ümumdünya Ticarət Təşkilatının (ÜTT) işçi qrupu ilə növbəti görüşlərin keçirilməsini (çoxtərəfli danışıqların IX mərhələsi) gözləyir. Bu barədə cümə günü danışıqlar qrupunun rəhbəri, xarici işlər nazirinin müavini Mahmud Məmmədquliyev deyib. Bundan əvvəl bu danışıqlar 2010-cu ilin dekabrına planlaşdırılmışdı.
"Güman edirəm ki, 2011-ci ilin birinci yarısında ÜTT-yə üzv ölkələrlə ikitərəfli danışıqlar, ikinci yarısında isə çoxtərəfli danışıqlar aparıla bilər", - Məmmədquliyev bildirib.
Sonuncu görüş (çoxtərəfli danışıqların VIII mərhələsi) oktyabrın 18-də Cenevrədə təşkil olunub, oktyabrın 19-22-də ABŞ, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə mallar və xidmət məsələləri üzrə ikitərəfli görüşlər aparılıb.
Məmmədquliyevin sözlərinə görə, bu danışıqlardan sonra Azərbaycan tərəfi ÜTT-yə üzv olan bir sıra ölkələrdən cavabları hazırlanacaq sualları almaqda davam edir. Bu günə yeni təkliflər də gəlməkdə davam edir.
"Danışıqlar məsələsində vacib amil Azərbaycanın ÜTT-yə qoşulmasında inkişaf etməkdə olan ölkə statusunu almasıdır. Bəzi ölkələr bununla razılaşır, bəziləri isə bu məsələyə qarşı çıxır. Bu istiqamətdə hazırda işlər aparılır", - nazir müavini deyib.
O, həmçinin ÜTT tələblərinə uyğun milli hüquqi bazanın yaradılmasının vacibliyini qeyd edib. 40-50 qanunverici akt təşkilatın tələblərinə uyğun olmalıdır və onlardan 30 sənəd artıq vahid şəklə salınıb. Gələn il bu istiqamətdə işlər davam etdiriləcək.
Nazir müavininin sözlərinə görə, Azərbaycanın ÜTT-yə qoşulması məsələsində əhəmiyyətli amil mallar və xidmətlər üzrə ikitərəfli danışıqlardır. Xüsusilə də bu, kənd təsərrüfatı məhsullarının istehsalı sahəsində ölkənin maraqlarının müdafiəsi məsələsinə aiddir. "Və bu məsələdə Azərbaycan tərəfi yerli kənd təsərrüfatı məhsullarının istehsalçıları və istehlakçılarını daha səmərəli şərtlərlə təmin etməyə çalışır", - Məmmədquliyev deyib.
Hazırda Azərbaycan 12 ölkə ilə danışıqlar prosesindədir, lakin bu siyahının genişlənməsi imkanı istisna deyil, belə ki, bu təcrübə artıq tətbiq edilib.
"ÜTT-yə qoşulma prosesi 17 ildir danışıqlar aparan Rusiyanın təcrübəsində təsdiq olunub. Azərbaycan isə bu danışıqlara 2004-cü ildən başlayıb", - Məmmədquliyev deyib.
Hazırda Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir. 2009-cu ildə bu siyahıya İsveçrə də qoşulub.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalanmaya razılıq verib.
Bu yaxınlarda ÜTT Katibliyi Azərbaycan üzrə işçi qrupunun tərkibini genişləndirib və ora daha 4 ölkə - Ukrayna, Braziliya, Ekvador və İsveçrəni əlavə edib. Nəticədə işçi qrupunun üzvlərinin sayı, Aİ-nin 27 ölkəsi də daxil olmaqla, 32-yə çatıb.
ÜTT yanında Azərbaycan üzrə işçi qrupu 1997-ci il iyulun 16-da yaradılıb. 1997-ci ildən Azərbaycan Ümumdünya Ticarət Təşkilatında müşahidəçi qismində təmsil olunur.
