Azərbaycan, Bakı, 10 dekabr /Trend, müxbir E.İsmayılov/
2011-ci ilin yanvarında Azərbaycan hökuməti ilə Avropa Komissiyası arasında assosiativ sazişin bağlanması haqqında danışıqların növbəti raundu keçiriləcək. Bu barədə cümə günü Azərbaycan xarici işlər nazirinin müavini Mahmud Məmmədquliyev deyib.
"Assosiativ üzvlüyə dair danışıqlar iyulda başlayıb. Oktyabrda danışıqların ikinci raundu keçirilib, lakin sənəd hələ ki imzalanmaya hazır deyil, çünki saziş üzrə danışıqlar prosesi geniş məsələlər spektrini əhatə edir", - nazir müavini bildirib.
Məmmədquliyevin sözlərinə görə, Azərbaycan tərəfi üçün ilk növbədə yeni səndin keyfiyyətinin yüksək səviyyədə olması əhəmiyyət kəsb edir, belə ki o, Aİ ilə gələcək əməkdaşlıq üçün hüquqi çərçivələr yaradacaq.
"Sənədin qısa müddət ərzində imzalamanması üçün bu istiqamətdə fəal iş aparmaq lazımdır", - Məmmədquliyev qeyd edib.
Assosiasiya haqqında saziş Azərbaycan və Aİ arasında siyasi dialoq və iqtisadi əməkdaşlıq üzrə iki müstəvidə olmaqla, əməkdaşlıq üçün çərçivə sənədidir.
Aİ tərəfindən sazişin Cənubi Qafqaz ölkələrinin hər biri ilə ayrı-ayrılıqda imzalanması nəzərdə tutulur və sənədin məzmunu Aİ ilə əməkdaşlığın səviyyəsindən asılı olacaq. Bundan başqa, Avropa İttifaqı ölkələri ilə viza rejiminin sadələşdirilməsi üzrə ayrıca sazişin imzalanması planlaşdırılıb.
Assosiativ sazişə dörd istiqamət - siyasi dialoq, o cümlədən təhlükəsizlik, ədliyyə və insan hüquqlarının qorunması məsələləri, iqtisadi və sosial-humanitar və ticarət məsələləri daxildir.
Sonuncu istiqamət gələcəkdə Azərbaycan məhsullarının Aİ-yə ixracı üçün imkan yaradacaq. Azərbaycan artıq Avropa İttifaqı ölkələrinə bir neçə min növ məhsulun rüsumsuz ixracı üzrə güzəştlərdən istifadə edir, lakin təəssüf ki, bu məsələdə malların keyyfiyəti əsas problem olaraq qalır.
Assosiasiya haqqında gələcək saziş 1995-ci ildə Azərbaycanla Aİ arasında tərəfdaşlıq və əməkdaşlıq haqqında imzalanan sazişi əvəz edəcək. O, prioritet istiqamətlərdə əməkdaşlığın əhəmiyyətli dərinləşməsini nəzərdə tutur.
Cənubi Qafqaz ölkələrinin münaqişələrin həlli və bu ölkələr üçün daxili islahatların aparılmasına təsirli stimul olan və Aİ-yə gələcək assosiativ üzvlüyün perspektivləri barədə qərar 2009-cu il sentyabrın 30-da Brüsseldə Cənubi Qafqaz ölkələri ilə əməkdaşlıq haqqında Aİ Şurasının illik sessiyası zamanı qəbul edilib.
