Azərbaycan, Bakı, 14 dekabr /Trend, müxbir Ü.İsmayılova/
Azərbaycan Qiymətləndiricilər Cəmiyyəti ölkənin Maliyyə Hesabatının Beynəlxalq Standartlarına (MHBS) keçməsi ilə bağlı əmlakın qiymətləndirilməsinin yeni metodologiyasının hazırlanmasına başlayır. Bu barədə çərşənbə axşamı cəmiyyətin əlaqələndiricisi Amil İsmayılov deyib.
"Qiymətləndiricilər Cəmiyyəti böyük müəssisələr tərəfindən edilən xeyli sayda müraciətlərlə əlaqədar qiymətləndirmənin yeni metodologiyasının hazırlanması üzrə işə başlayır. Belə ki, yeni maliyyə hesabatlarının standartları üzrə əmlakın qiymətləndirilməsi üzrə üsulların dəyişidirilməsi də tələb olunur", - İsmayılov qeyd edib.
Bazar qiymətləri üzrə aktivlərin uçotu maliyyə hesabatında olan informasiyanın obyektivliyinin şərtlərindən biridir. MHBS-nin prinsipləri istifadəçilərin obyektiv informasiya ilə təminini nəzərdə tutur.
İctimai əhəmiyyətli təşkilatlara ARDNŞ (Azərbaycan Respublikası Dövlət Neft Şirkəti), "Azərenerji", "Bakıelektrikşəbəkə", "Azercell" mobil rabitə operatoru, ARDNŞ-nin Neft kəmərləri, Marketinq və iqtisadi əməliyyatlar idarələri, "Azneft" İB, H.Əliyev adına Bakı və "Azneftyağ" neft emalı zavodları, "Azərbaycan Dəmir Yolları" QSC, Bakı Metropoliteni, "Azərbaycan Hava Yolları" QSC və Milli Aviasiya Şirkəti, Dövlət Xəzər Dəniz Gəmiçiliyi, "Azəriqaz", "Azəriqaznəql", "Azərsu", "Aztelekom" İB, "Azərikimya" İB və onun tərkibinə daxil olan Etilen-polietilen zavodu aiddir.
"Mühasibat uçotu haqqında" qanuna müvafiq olaraq, kommersiya təşkilatlarında beynəlxalq standartlar əsasında qəbul edilmiş milli standartların tətbiqi 2007-ci ilin sonunadək başa çatdırılmalı idi. Bununla əlaqədar, Milli mühasibat uçotu standartlarının tətbiqi üzrə Dövlət Proqramında 2005-2008-ci illər ərzində standartların növbəli tətbiqi göstərilir. Büdcə və qeyri-hökumət təşkilatları bu prosesi 2008-ci ilin sonunadək başa çatdırmalı idilər, kiçik və orta müəssisələr üçün 2006-cı il yanvarın 1-dək vaxt ayrılmışdı. 2009-cu il yanvarın 1-dək bələdiyyələr, büdcə təşkilatları, dövlət fondları üçün ən son müddət müəyyən edilmişdi.
Praktikada proses davam etdirilir.
Azərbaycanda qiymətləndirmə fəaliyyəti 1995-ci ildə qəbul edilən "Qiymətləndirmə fəaliyyəti haqqında" qanunla tənzimlənir.