Azərbaycan, Bakı, 14 dekabr /Trend, müxbir N.İsmayılova/
2010-cu ilin noyabrında Azərbaycanda istehlak malları üzrə qiymətlər və xidmətlərlə bağlı tariflər əvvəlki ayla müqayisədə 1,8 faiz, ötən ilin yanvar-noyabr ayları ilə müqayisədə isə 5,5 faiz artıb. Bu barədə Dövlət Statistika Komitəsinin çərşənbə axşamı yaydığı məlumatda deyilir.
Noyabrda ərzaq mallarının qiymətləri 2,5 faiz, qeyri-ərzaq mallarının qiymətləri 0,4 faiz, xidmətlər üzrə tariflər isə 0,9 faiz artıb.
Cari ilin yanvar-noyabr aylarında ötən ilin analoji dövrü ilə müqayisədə ərzaq məhsulları 6,7 faiz, qeyri-ərzaq malları 2,2 faiz, xidmət sahəsində tariflər isə 4,7 faiz bahalaşıb.
Noyabrda mövsümi dəyişikliklərə məruz qalan məhsulların (meyvə və tərəvəzlər) qiymətləri, dövlət tərəfindən tənzimlənən mal və xidmətlər çıxılmaqla hesablanan istehlak qiymətlərinin bazis indeksi ötən ayla müqayisədə 1,4 faiz, 2009-cu ilin yanvar-noyabr ayları ilə müqayisədə isə il ərzində 3,3 faiz artıb.