Azərbaycan, Bakı, 27 dekabr /Trend, müxbir Ü.İsmayılova/
Azərbaycanın Life-şirkəti "Qala Həyat" şirkətin inkişafı üçün əlavə xarici investisiyaların cəlb edilməsi fikrində deyil. Bu barədə strukturun idarə heyətinin sədri Abbas Babayev bazar ertəsi mətbuat konfransında bəyan edib.
"Şirkət öz fəaliyyətinin birinci mərhələsində səhmdarının, ölkədə yeganə təkrar sığorta şirkəti olan "AzRe Təkrar Sığorta"nın vəsaitləri hesabına inkişaf edəcək", - Babayev bildirib.
Onun sözlərinə görə, şirkətin əsas məqsədi Azərbaycanda həyat sığortasının aktiv inkişaf etdirilməsidir, lakin əgər gələcəkdə belə tələbat yaranarsa, onda xarici kapitalın cəlb edilməsinin mümkünlüyü istisna edilmir.
Birinci mərhələdə şirkət əsasən istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsinə görə icbari sığorta xidməti göstərəcək. Bu gün şirkət artıq "Qarant Sığorta" ilə ilk müqaviləsini imzalayıb.
Babayevin fikrincə, gələcəkdə icbari həyat sığortasının tətbiqi könüllü həyat sığortasının inkişafı üçün təkan olacaq.
"Atəşgah Həyat" şirkətindən sonra Azərbaycanda ikinci Life-şirkət olan "Qala Həyat"ın səhmdarı yeganə təkrar sığorta şirkəti olan "AzRe Təkrar Sığorta"dır. Şirkət könüllü xidmət (bədbəxt hadisələrdən, yaş həddi, əmək qabiliyyəti, sağalmaz xəstəliklərdən və ipoteka kreditləşməsi üzrə borc götürənlərinin həyat sığortası), eləcə də bir icbari xidmət növü (istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsinə görə icbari sığorta xidməti) üzrə fəaliyyət göstərir. Şirkətin nizamnamə kapitalı 3,5 milyon manat təşkil edir. 2013-cü ilin yanvarından şirkətin kapitalı beş milyon manatadək çatdırılacaq.
Dekabrın 27-nə olan rəsmi məzənnə 0,7985 AZN/USD təşkil edir.
