Azərbaycan, Bakı, 5 yanvar /Trend, müxbir N.İsmayılova/
Azərbaycan Mərkəzi Bankı (AMB) nəzdində fəaliyyət göstərən İpoteka Fondunun (AİF) xətti ilə 2010-cu ildə 95,9 milyon manat kredit verilib. Bu barədə çərşənbə günü AİF-in məlumatında deyilir.
Bundan əvvəl bankların verdiyi kreditlərin yenidən maliyyələşməsinin ümumi həcmi 90,5 milyon manat təşkil edib. 2010-cu il dövlət büdcəsindən sosial ipotekanın maliyyələşməsi üçün nəzərdə tutulan 14 milyon manat məbləğ ayrılıb. 2010-cu ildə AİF-in 81 milyon manat məbləğində ipoteka istiqrazları yerləşdirilib.
Gənclərin və gənc ailələrin payına verilən ümumi kreditlərdən (borc alanların 41 faizi 18-29 yaşda, 31 faizi isə 30-35 yaşda olub) 72 faiz düşür. Kreditlərin 28 faizi 36 yaşdan yuxarı borc alanların payına düşür.
AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.
Kreditlər milli valyutada - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir, kreditə görə aylıq ödəniş borc alanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
2006-cı il martın 1-dən işə salınan ipoteka kreditləşməsi prosesi vəsait çatışmazlığı səbəbindən 2007-ci ilin yayında dayandırılmış, 2009-cu il iyunun 1-dən etibarən isə bərpa edilmişdi.
