Azərbaycan, Bakı, 10 yanvar /Trend, müxbir N.İsmayılova/
Azərbaycanda qızıl istehsalçısı olan "Anglo Asian Mining Plc" şirkətinin il ərzində xalis borcu təxminən 40 faiz - 42,2 milyon dollardan 25,6 milyon dollaradək azalıb. Bu barədə bazar ertəsi şirkətdən verilən məlumatda deyilir.
"2010-cu il dekabrın 31-nə şirkətin ümumi borcu 30,6 milyon dollar təşkil edib. Hazırda şirkətin balansında nağd şəkildə 5 milyon dollar var, nəticədə 2010-cu il dekabrın 31-nə xalis borcun həcmi 25,6 milyon dollaradək azalır", - məlumatda deyilir.
Şirkət tərəfindən cəlb edilən kredit və borcların həcmi 2010-cu il dekabrın 31-nə 43 milyon dollar təşkil edib, halbuki 2010-cu ilin martında 45,9 milyon dollar səviyyəsində olub.
"Anglo Asian Mining PLC" şirkəti Azərbaycanın cənub-qərbində yerləşən altı - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlü yataqlarının 1997-ci ilin avqustunda Azərbaycan hökuməti ilə imzalanan PSA tipli məhsulun pay bölgüsü sazişi əsasında işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasilatı planlaşdırılır.
İlk qızıl və gümüş 2009-cu ilin mayında Gədəbəy yatağından hasil edilib. Ümumilikdə, 2015-ci ilədək Gədəbəy yatağından 300 min unsiya qızılın hasil edilməsi planlaşdırılır.
