Azərbaycan, Bakı, 13 yanvar /Trend, müxbir E.İsmayılov/
Martda Bakıda ТRACECA proqramı çərçivəsində Azərbaycanın nəqliyyat qurumları üçün seminar keçiriləcək. Bu barədə cümə axşamı TRACECA-nın Azərbaycan üzrə milli katibi Akif Mustafayev deyib.
Onun sözlərinə görə, nəqliyyatın modelləşdirilməsi və uzunmüddətli planlaşdırma mövzusunda seminarın təşkili ölkədə nəqliyyat sahəsində uzunmüddətli perspektiv üçün inkişaf məqsədilə nəzərdə tutulub.
"Azərbaycanda nəqliyyat sahəsində uzunmüddətli planlaşdırma yayılmayıb. Bizdə əsasən beş il müddətinə planlaşdırma tətbiq edilir. Məhz bu məqsədlə seminarın keçirilməsi ilə bağlı qərar qəbul edilib", - Mustafayev bildirib.
Onun sözlərinə görə, seminarda müxtəlif nəqliyyat qurumlarının, xüsusən Nəqliyyat Nazirliyinin bölmələrinin, Bakı limanının 11 nümayəndəsi iştirak edəcək. Seminarı Avropa İttifaqının mütəxəssisi aparacaq.
TRACECA Aİ və onun Şərqi Avropa, Cənubi Qafqaz və Mərkəzi Asiyadakı tərəfdaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda da Daimi Katibliyi var.
Hazırda TRACECA-ya üzv olan iştirakçı dövlətlər bunlardır: Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna, İran.
