Azərbaycan, Bakı, 17 yanvar /Trend, müxbir Ü.İsmayılova/
Azərbaycan Mədəniyyət və Turizm Nazirliyi 2010-cu ildə turizm xidmətlərinin göstərilməsi üzrə hüquqi və fiziki şəxslərə 38 lisenziya verib. Bu barədə nazirliyin 2010-cu il üzrə fəaliyyət yekunlarına dair hesabatında deyilir.
"Hazırda ölkədə 207 lisenziyalaşdırılmış turizm şirkəti fəaliyyət göstərir", - hesabatda bildirilir.
Ötən il nazirlik "Hyrcan Touroperator-S" MMC-nin lisenziyasını qanunvericiliyin tələblərinə riayət etməməsi səbəbindən ləğv edib. Şirkətin lisenziyası 2010-cu il iyunun 12-də ləğv olunub.
2010-cu il ərzində 21 hüquqi və fiziki şəxsə mehmanxana xidmətlərinin göstərilməsi üzrə lisenziya verilib. Hazırda ölkədə nazirliyin lisenziyası əsasında 295 mehmanxana və mehmanxana tipli obyekt fəaliyyət göstərir. Ötən il 16 mehmanxana və mehmanxana tipli obyekt dövlət ixtisaslaşmasından keçib və nəticədə belə obyektlərin sayı 77 olub.
2010-cu ildə turizm potensialının təbliği məqsədilə dünyanın CNN, Euronews, Travel Channel, BBC, CNBC, National Geographic kimi aparıcı telekanallarında reklam çarxları nümayiş etdirilib, eləcə də AVTA jurnalında, "Upper Reach" və "Forbes" qəzetlərində reklamlar yerləşdirilib.
Nazirliyin ölkənin turizm potensialının təbliği sahəsində ən mühüm tədbirlərindən biri ölkənin turizm bazarının beynəlxalq mədəni turizm marşrutlarının işlənib hazırlanması yolu ilə dünya bazarlarına inteqrasiyasıdır. Bununla əlaqədar nazirlik Avropa Şurasının "Kiyev təşəbbüsü" layihəsi çərçivəsində "Azərbaycanın şərab yolları" və "Aleksandr Düma Qafqazda" beynəlxalq marşrutlarını, eləcə də "Azərbaycanda alman məntəqələri" beynəlxalq layihəsini hazırlayıb.
"Azərbaycanın şərab yolları" layihəsi çərçivəsində nazirlik tərəfindən Beynəlxalq Mədəniyyət və Turizm Mübadiləsi Assosiasiyası yaradılıb.
Hesabatda deyilir ki, 2010-cu ildə nazirlik "Turizm haqqında" yeni qanun layihəsi hazırlayıb və ekspertiza üçün Azərbaycan Ədliyyə Nazirliyinə təqdim olunub.
Ötən il ərzində nazirlik Azərbaycanın turizm potensialının fəal təbliği məqsədilə bir sıra beynəlxalq sərgi və konfranslarda iştirak edib.
Azərbaycan Prezidenti İlham Əliyev Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında 2011-ci ili Azərbaycanda "Turizm ili" elan edib.
"2011-ci ilin "Turizm ili" elan olunmasını təklif edirəm. 2011-ci ildə Bakıda beş beşulduzlu mehmanxana açılacaq ki, bu da çox güman ki, dünyada analoqu olmayan hadisədir. Eyni zamanda, Bakıda dördulduzlu, üçulduzlu mehmanxanalar da açılacaq. Regionlarda mehmanxana işi ilə bağlı böyük iş gedir, Azərbaycanda turizmin inkişafı artıq reallıqdır", - Prezident deyib.
