Azərbaycan, Bakı, 18 yanvar /Trend, müxbir N.İsmayılova/
2010-cu ilin yekunları üzrə Azərbaycan Mərkəzi Bankı yanında Mərkəzləşdirilmiş Kredit Reyestri Xidmətinə ölkədəki 42 bankdan 257 045 müraciət daxil olub. Bu barədə çərşənbə axşamı xidmətin məlumatında deyilir. Müraciətlərin ümumi sayından 219 269 müraciət yeni borcgötürənlərdən daxil olub.
2009-cu illə müqayisədə xidmətə ümumi müraciətlərin sayı 3,45 dəfə artıb. 2009-cu ildə sorğuların ümumi sayı 74 393 təşkil edib. 2010-cu ildə 298 şəxs təşkilata öz kredit hesabatını almaq məqsədilə müraciət edib.
Cari ilin yanvarın 1-nə olan məlumata görə, kredit reyestrində haqqında məlumat olan borgötürənlərin sayı 962 546, kredit məlumatlarının ümumi sayı isə 1 883 260 təşkil edir. 2009-cu ilin sonlarına olan məlumata görə, reyestrdə 704 275 borc götürən haqqında və 1 322 524 kredit məlumatı var. 2010-cu il ərzində borcgötürənlər barədə 258 571 və kreditlər üzrə 560 736 yeni məlumat daxil olub. Reyestrdə olan borcgötürənlər üzrə məlumatların sayı 434 593 təşkil edir.
Mərkəzləşdirilmiş Kredit Reyestri Xidməti 2005-ci ilin martından fəaliyyət göstərməyə başlayıb. Fiziki şəxslər üzrə bir sorğunun tarifi 1,1 manat, hüquqi şəxslər üçün iki manat təşkil edir. Kredit reyestri kommersiya məqsədləri daşımır, tariflər inzibati xərclərin ödənilməsi üçün tətbiq edilir.
Yanvarın 18-nə rəsmi məzənnə 0,7974 AZN/USD təşkil edir.