Azərbaycan, Bakı, 19 yanvar /Trend, müxbir Ü.İsmayılova/
Azərbaycanın sığorta bazarında həyat sığortası üzrə cəmi iki ixtisaslaşmış şirkətin olması istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə əhalinin iqtisadi fəal hissəsinin əhatə edilməsi üçün problem yaratmır. Bu barədə çərşənbə günü Azərbaycan Maliyyə Nazirliyi nəzdində Dövlət Sığorta Nəzarəti Xidmətinin rəisi Namiq Xəlilov deyib.
Qanunvericiliyə əsasən, sığortanın bu növü üzrə xidmətləri yalnız müstəsna olaraq həyat sığortası və bu xidmət növünə fəaliyyət lisenziyasına malik şirkətlər göstərə bilərlər.
"Yeni sığorta xidmətlərinin göstərilməsi üçün çoxlu sayda sığorta şirkətlərinin olması vacib deyil, əsas odur ki, xeyli agent şəbəkəsi olsun", - Xəlilov qeyd edib.
Onun sözlərinə görə, sığorta xidmətlərinin satılması və müqavilələrin bağlanması agent şəbəkəsinin fəallığından asılıdır və bu, satış şəbəkəsinin düzgün təşkilində sığortaçılar üçün problem yaratmayacaq.
"Yanvarın birinci yarısında Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə 500-dən çox müqavilə bağlanıb", - Xəlilov bildirib. Şirkətlər bu xidmətlərin göstərilməsinə 2011-ci ildən başlayıblar. Müqavilələrin hamısı həyat sığortasında ixtisaslaşaraq fəaliyyət göstərən "Qala Həyat" və "Atəşgah Həyat" sığorta şirkətləri ilə bağlanılıb.
2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiq edib.
İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə tariflər iqtisadi fəaliyyətin növündən və işçilərin kateqoriyasından asılı olaraq dəyişir.
Qulluqçu kateqoriyalı işçilər üçün icbari sığorta üzrə tariflər fondun əməkhaqqısının 0,2-0,5 faizi, işçilər kateqoriyası üçün isə 0,4 faizdən 2 faizədək dəyişir.
