Azərbaycan, Bakı, 2 fevral /Trend, müxbir Ü.İsmayılova/
Azərbaycanda 90-cı illərdə aparılan aqrar islahatlar nəticəsində kənd təsərrüfatı məhsullarının istehsalı artıb ki, bu da ölkənin ixrac potensialının artırılmasına kömək edib. Bu barədə Azərbaycanın kənd təsərrüfatı naziri İsmət Abbasovun rəsmi mətbuatda dərc olunan məqaləsində deyilir.
"2004-cü ildə kənd təsərrüfatı məhsullarının ixracı 137 milyon dollar, 2005-ci ildə 284 milyon dollar, 2006-cı ildə 284,5 milyon dollar, 2007-ci ildə 438,2 milyon dollar, 2008-ci ildə 406,7 milyon dollar, 2009-cu ildə 395,1 milyon dollar təşkil edib", - nazir deyib.
Azərbaycanda kənd təsərrüfatı məhsullarının ixracı strukturunda böyük hissə toxumdan təmizlənmiş pambığın, tütünün, kartofun, tərəvəz və meyvənin payına düşür.
Nazirin sözlərinə görə, kənd təsərrüfatı məhsullarının emalı üzrə mövcud zavodların yenidən qurulması və yenilərinin tikilməsi də meyvə və tərəvəz konservlərinin, meyvə şirələrinin və alkoqollu içkilərin ixracı üçün şərait yaradıb.
Beləliklə, 2004-cü ildə kənd təsərrüfatı məhsullarının ixracı 41 milyon dollar, 2005-ci ildə 61 milyon dollar, 2006-cı ildə 103,3 milyon dollar, 2007-ci ildə 222,6 milyon dollar, 2008-ci ildə 145,2 milyon dollar, 2009-cu ildə 162,8 milyon dollar təşkil edib.
2010-cu ilin 10 ayı ərzində ölkədən 285,564 milyon dollarlıq kənd təsərrüfatı məhsulu, o cümlədən 97,117 milyon dollar həcmində bitkiçilik, 16,375 milyon dollar heyvandarlıq və 172,071 milyon dollar həcmində kənd təsərrüfatı emalı məhsulları ixrac olunub.
2010-cu ilin 10 ayı ərzində kənd təsərrüfatı məhsullarının ixrac həcmi 2009-cu ilin analoji dövrü ilə müqayisədə 1,7 faiz azalıb. Bu dövr ərzində bitkiçilik məhsullarının ixracı 62,8 faiz, heyvandarlıq 27,6 faiz, kənd təsərrüfatı emalı məhsulları 39,9 faiz azalıb.
Nazir həmçinin bildirib ki, 2010-cu ilin yanvar-oktyabr aylarında Azərbaycan 712,512 milyon dollar həcmində kənd təsərrüfatı məhsulu, o cümlədən, 285,382 milyon dollarlıq bitkiçilik, 67,879 milyon dollarlıq heyvandarlıq və 359,249 milyon dollarlıq kənd təsərrüfatı emalı məhsulları idxal edib.
2010-cu ilin 10 ayı ərzində kənd təsərrüfatı məhsullarının idxalı 2009-cu ilin analoji dövrü ilə müayisədə 29,3 faiz, o cümlədən bitkiçilik məhsulları 37,7 faiz, heyvandarlıq 43,6 faiz, kənd təsərrüfatı emalı məhsulları 21,1 faiz artıb.
