...

Azərbaycan bankı "Paşa Bank" qiymətli kağızlarla əməliyyatların aktiv irəliləyişinə istiqamətlənib

Biznes və iqtisadiyyat xəbərləri Materials 24 Fevral 2011 16:03 (UTC +04:00)

Azərbaycan, Bakı, 24 fevral /Trend, müxbir N.İsmayılova/

Azərbaycan bankı "Paşa Bank"ın qiymətli kağızlar üzrə investisiya portfeli ötən il ərzində 86 artaraq 156,5 milyon manat təşkil edib. Bu barədə cümə axşamı bankın idarə heyətinin sədri Fərid Axundov 2010-cu ilin fəaliyyət yekunlarına həsr olunmuş mətbuat konfransında bildirib.

"Ötən il bank "Reuters" və "Bloomberg" sistemlərinə qoşulub, xarici valyutada da qiymətli kağızlarla əməliyyatlarda fəal və effektiv iştirak edib. Banklararası yerləşdirmə və qalıqlar 54 faiz artaraq 74,6 milyon manat təşkil edib, xəzinədarlıq əməliyyatlarından əldə olunan faizsiz gəlirlər 105 faiz artaraq 4,1 milyon manat olub", - o qeyd edib.

Axundovun sözlərinə görə, bank qızılla ticarət əməliyyatlarının uğurla aparılmasına başlayıb.

"Biz əla yeni alətlərlə işləməyə hazırlaşmışıq. Biz xarici bazarlarda qızıl alıb satırıq, eləcə də qiymətli kağızların ticarəti kimi digər yeni alətlərdə də fəal irəliləyirik. Bunlar əsasən Azərbaycan emitentlərinin istiqraz, dövlət və korporativ istiqraz vərəqələridir", - o deyib.

Onun sözlərinə görə, bu il bank həm yaxın, həm də uzaq xarici dövlət və şirkətlərin buraxdığı istiqrazlarla işləməyi planlaşdırır. Həmçinin, bank Rusiya və Ukraynanın bazarlarına çıxmağı nəzərdə tutub.

"Bu hələlik yalnız bankın xeyrinə aparılacaq, lakin perspektivdə belə xidmətlərin azərbaycanlı müştərilərə də göstərilməsi mümkündür", - o deyib.

Axundovun sözlərinə görə, avrobondların buraxılışı üzrə işlərin 2009-2011-ci illər üzrə üçillik inkişaf strategiyası çərçivəsində görülməsi nəzərdə tutulub. Gələcəkdə bank bu istiqamətdə fəaliyyətini möhkəmləndirəcək, onların həcminin artırılması ilə bağlı konkret tədbirlər görüləcək.

"Bank həm də IPO emissiyasının təşkilatçısı kimi çıxış etməyi planlaşdırır. Ötən il bizim marketmeyker kimi çıxış etməli olduğumuz sövdələşmə baş tutmadı. Bu il bir neçə potensial emitentlərlə danışıqlar aparırıq. Ümid edirik ki, bizim təkliflərimiz onları maraqlandırır və bu emitentlərin riskləri əlverişli və bazar üçün maraqlı olacaq", - o deyib.

Onun sözlərinə görə, bank bu məhsulu Azərbaycan bazarına çıxartmağı planlaşdırır, lakin xarici bazara çıxmaq hələ tezdir, çünki bu gün ona yalnız bankların özləri çıxırlar.

"Ona görə də çox istərdik ki, Maliyyə Nazirliyinin simasında dövlət Azərbaycan şirkətləri və bankları üçün xaricdə bençmark yarada bilsin, çünki onsuz tək atəşlər effektli deyil. Riskin dəyəri olmalıdır və o çıxacaq, banklar və şirkətlər üçün dəyər yaranacaq", - o deyib.

"Paşa Bank" 2007-ci ilin iyununda təsis edilib və Azərbaycan Mərkəzi Bankının 2007-ci il 28 yanvar tarixli lisenziyası əsasında fəaliyyət göstərir.

"Paşa Bank" ASC "Pasha Insurance", "PASHA Life", "Pasha Travel" və "Pasha Construction" ilə birgə "Pasha Holding"in tərkibinə daxildir. "Pasha Holding" klassik holdinq yox, faktiki olaraq investisiya şirkətidir.

Bankın səhmdarları strukturunda pay bölgüsü aşağıdakı kimidir: "PASHA Holding"ə səhmlərin 60 faizi, "ADOR ltd" şirkətinə 30 faiz, Arif Paşayevə isə 10 faiz məxsusdur.

Fevralın 24-nə olan rəsmi məzənnə 0,7943 AZN/USD təşkil edir.

Xəbər lenti

Xəbər lenti