Azərbaycan, Bakı, 25 fevral /Trend, müxbir Ü.İsmayılova/
Yanvarda Bakıda ilkin mənzil bazarın bir kvadratmetrinin qiyməti 2010-cu ilin dekabrında olduğu kimi, 848 manat təşkil edib. Bu barədə "Əmlak Bazarı İştirakçıları" İctimai Birliyinin cümə günü yaydığı məlumatda deyilir.
"Ümumi siyahı üzrə satış qiyməti 400-800 manat arasında olan yeni tikililər 271 ədəd, 801-1200 manat dəyərində olanlar 83 ədəd, 1201-2000 manat arasında olan hündür mərtəbəli yaşayış binaları isə 64 ədəd təşkil edib. Qiyməti 2000-dən yuxarı olan binaların sayı isə 24 olub", - məlumatda deyilir.
Bu fərq ötən rübün müvafiq dövrü ilə müqayisədə 1,9 faiz, ötən illə müqayisədə isə 4 faiz azalma ilə müşahidə edilib. "Alıcı kütləsi hazırda da 1 kvadratmetr üzrə 500-600 manat arasında dəyişən yeni tikililərə üstünlük verir", - məlumatda qeyd edilib.
Yanvarda ilkin bazarda satışa çıxarılan binaların sayı ötən aydakı 443-ə qarşı 442 olub. Xətai rayonunda 1 yeni tikili satışdan çıxıb. Bünövrəsi qoyulan yeni tikili müşahidə edilməyib. Seqment üzrə ümumi tikinti işləri aparan şirkətlərin sayı ötən aydakı kimi 155 ədəd olaraq qalıb.
Yanvarda Bakı şəhəri üzrə qeydə alınan 442 binanın inşa vəziyyəti belə paylanıb: ümumi siyahı üzrə 81%-i artıq başa çatmış və ya çatmaqda olan yen tikililərin (müvafiq olaraq 32% və 49%) üzərinə düşüb. Tikinti işlərinin başladığı və ya orta mərhələdə olan binalar 11% təşkil edib. Yerdə qalan 8% isə tikinti işlərinin dondurulmuş vəziyyətdə olduğu və ya ləng getdiyi binalardır.
Fevralın 25-nə olan rəsmi məzənnə 0,7941 AZN/USD təşkil edir.