Fars körfəzi körpüsünün tikilməsi üçün 650 milyon avro vəsait ayrılacaq və üç il ərzində bu körpü tikiləcək. Bu sözləri İranın Turizm və Mədəni Abidələrin Mühafizəsi İdarəsinin və Azad İqtisadi Zonalar üzrə Mərkəzin sədri Həmid Bəqayi deyib. Bu barədə Trend İranın İLNA xəbər agentliyinə istinadən məlumat verir.
Fars körfəzi körpüsü İranın Qəşm adası ilə Bəndər Abbas şəhərini birləşdirəcək. Bu körpünün tikilməsi ideyası hələ İranın keçmiş prezidenti Əli Əkbər Haşimi Rəfsəncaninin hakimiyyəti dövründə (1989-1997-ci illər) irəli sürülmüşdü. Körpünün tikilməsi üzrə layihə 2009-cu ildə təkmilləşdirilib və ölkənin nazirlər kabinetində müzakirəyə çıxarılıb. Lakin hazırkı prezident Mahmud Əhmədinejadın körpü əvəzinə dəniz dibindən tunelin çəkilməsi təklifi layihənin icrasını ləngidib. Sonradan ekspertlər tunel çəkilməsi xərclərinin körpü inşası xərclərindən daha çox olacağını bildiriblər və yenidən körpünün tikilməsi gündəmə gəlib.
Bəqayi deyib ki, Fars körfəzi körpüsünün tikilməsi üçün tender elan olunub və tenderin qalibini adı yaxın günlərdə açıqlanacaq.
"Körpünün uzunluğu 2 kilometrdir. Körpü Qəşm adasının cənub regionunu İran ərazisinə birləşdirir. Körpünün tikilməsi müxtəlif sərmayə yatırımları baxımından, xüsusilə neft sahəsində və gəmilərə yanacaq çatdırılması sahəsində faydalı ola bilər", - Bəqayi deyib.
O, əlavə edib ki, körpünün tikilməsi üçün lazım olan vəsaitin 85 faizi özəl sektor, 15 faizi isə dövlət tərəfindən təmin olunacaq.