Azərbaycan, Bakı, 7 mart /Trend, müxbir İ.Xəlilova/
Asiya İnkişaf Bankı (AİB) Masallı-Astara avtomobil yolunun tikintisi layihəsi üçün əlavə maliyyələşdirmənin ayrılması ilə bağlı danışıqlar prosesinin sürətləndirilməsində maraqlıdır. Bu barədə bazar ertəsi bankın Bakı nümayəndəliyindən deyiblər.
"Bank kreditin verilməsi prosesini sürətləndirmək üçün martın 20-dək danışıqlar aparmağı planlaşdırır, - nümayəndəlikdən bildiriblər. - Layihənin həyata keçirilməsinə AİB tərəfindən əlavə olaraq 160-170 milyon dollar ayrılacaq".
Maliyyələşdirmə 2007-ci ilin avqrustunda 500 milyon məbləğində təsdiq edilən Azərbaycanda yol layihələri üçün multitranş paketin (Multitranche Financing Facility - MFF) üçüncü tranşından həyata keçiriləcək. Əvvəllər MFF-in üçüncü krediti Gəncə-Qazax avtomobil yolunun şərq-qərb hissəsinin modernləşdirilməsi üçün nəzərdə tutulmuşdu.
Masallı-Astara yolunun yenidən qurulmasına bank artıq 200 milyon dollar ayırıb, Azərbaycan hökumətinin iştirak payı isə 49 milyon dollar təşkil edib.
Bankın proseduruna əsasən, MFF-in növbəti tranşı bankın Direktorlar Şurasının müzakirəsinə çıxarılmayacaq. Kredit AİB prezidentinin kreditlə bağlı rəsmi danışıqlarının yekunları üzrə sənədin imzalanmasından sonra qüvvəyə minəcək.
Yolun birinci hissəsinin tikintisi üçün "Azərinşaatservis" tikinti şirkəti seçilib, qalan iki hissə üçün tender proseduru apreldə başa çatacaq. Layihənin bahalaşması ilə əlaqədar məsləhətçi 2008-ci ildə hazırlanan xərclər smetasına müvafiq dəyişikliklər etməlidir, çünki ötən müddət ərzində tikinti materialları və s. bahalaşıb. Layihə yenidən qiymətləndirildikdən sonra onun dəyəri 400 milyon dolları ötür.
MFF-in bütün paketinin mənimsənilməsi 2014-cü ilədək nəzərdə tutulub.