Azərbaycan, Bakı, 14 mart /Trend, müxbir N.İsmayılova/
Azərbaycan bankı "Nikoil Bank" "Vadiə əd-Damənə" islam bankçılığı məhsulunu tətbiq edib və bu istiqamətdə daha üç məhsulun hazırlayır. Bu barədə bazar ertəsi bankın biznesin inkişafı departamenti yanında islam bankçılığı məhsulunun inkişafı üzrə aparıcı meneceri Anar Yusufzadə deyib.
"Yeni məhsul əmanət depozitidir. Onun üstünə faizlər gəlmir. İslam bankçılığının daha üç məhsulu hazırlanma mərhələsindədir. Onlar artıq gəlirli olan bir depozit və iki kredit məhsuludur", - Yusifzadə qeyd edib.
Onun sözlərinə görə, hazırda Azərbaycan qanunvericiliyi islam bankçılığının bütün məhsullarından istifadə etməyə imkan vermir, lakin qanunvericiliyin müddəalarını pozmadan ölkədə bir sıra məhsulları tətbiq etmək olar.
"Hazırlanan məhsullar şəriətin bütün yüksək tələblərini nəzərə alır, eyni zamanda, Azərbaycanın qüvvədə olan qanunvericiliyinə ziddiyyət təşkil etmir", - o vurğulayıb.
Onun sözlərinə görə, bankın bundan sonra bu istiqamətdə xidmətlər çeşidini genişləndirməsi çətindir, çünki islam bankçılığının prinsipləri hazırda yerli qanunvericiliklə məhdudlaşdırılan real sektora istiqamətlənib.
"Bank hazırlanan üç məhsulu onun islam prinsiplərinə uyğunluğunu yoxlayan şəriət paneli tərəfindən aparılan xarici auditə göndərir", - Yusufzadə bildirib.
Onun sözlərinə görə, hazırda Azərbaycanda islam qaydalarına əməl edən xeyli insan var. İmanlı şəxslərin bəziləri öz əmanətlərini investisiya etmək, digərləri isə islam bankçılığının prinsiplərinə uyğun resurslardan istifadə etmək istəyirlər.
"Tədqiqat zamanı ölkənin müsəlman əhalisinin bu servisin məhsullarına tələbatının olması təsdiqlənib", - Yusufzadə qeyd edib.
Bu məhsuldan "Nikoil Bank"ın Bakı, Gəncə, Sumqayıt, Bərdə, Lənkəran, Qəbələ və Yevlaxdakı bütün 14 filialında istifadə edilməsi planlaşdırılır. Bank AAOIFI (İslam maliyyə institutları üçün auditor və mühasibat təşkilatı), IRTI (İslam tədqiqatlar və treninq institutu, İslam İnkişaf Bankı qrupu), "Amanie Business Services Malaysia" və islam dünyasının bir sıra təşkilat və alimləri ilə əməkdaşlıq edir.
Hazırda Nikoil Bank belə xidmət təklif edən ilk Azərbaycan bankıdır. Əvvəllər islam bankçılığı xidmətinin göstərilməsi ilə bağlı Azərbaycan Beynəlxalq Bankı, "Amrahbank", "Turanbank", "Texnikabank" öz istəklərini bildirmişdilər.
"Nikoil Bank" Azərbaycanda 1997-ci ildən fəaliyyət göstərir. 2008-ci ildə "Topaz İnvestments" şirkəti tərəfindən "Nikoil Bank"ın nəzarət paketi alındıqdan sonra səhmdarların iştirakı aşağıdakı kimidir: "Topaz İnvestments" - 53,1%, "Nikoil" QSC - 28,7%, "Uralsib-İnvest" MMC - 13,9% və "ISR Holding" - 4,3%.
