Azərbaycan, Bakı, 15 mart /Trend, müxbir N.İsmayılova/
Azərbaycanın "Milli Kart" MMC prosessinq mərkəzinin Təsisçilər Şurası 2011-ci il üçün büdcə, taktiki plan və biznes-planı təsdiq edib. Bu barədə çərşənbə axşamı Trend-ə "Milli Kart"ın icraçı direktoru Cəlal Orucov deyib.
"Mərkəzin yeni biznes-planına əsasən, 2011-ci il ərzində buraxılan plastik kartların sayının indiki 162 min ədəddən 250 min ədədə qədər artırılması planlaşdırılır", - Orucov qeyd edib.
Onun sözlərinə görə, biznes-plana ölkədə nağdsız ödənişlərin stimullaşdırılması üzrə bir sıra tədbirlər daxildir. Hazırda "Milli Kart" 12 Azərbaycan bankının kartını buraxır.
Keçən iclasda hər il olduğu kimi Direktorlar Şurasının yeni rəhbərinin təyin edilməsi məsələsi müzakirə edilməyib.
"Hazırda "Unibank"ın sədr olduğu Direktorlar Şurasının sədri vəzifəsinə rotasiyanın aparılması mərkəzin növbəti ümumi yığınacağı çərçivəsində olacaq. Onun tarixi hələ ki razılaşdırılmayıb", - Orucov vurğulayıb.
"Milli Kart" MMC 2006-cı il iyulun 14-də ölkənin 18 bankı tərəfindən Azərbaycan Mərkəzi Bankının kart ödənişləri üzrə Prosessinq Mərkəzinin alınmasından sonra yaradılıb. Hazırda mərkəzin kapitalında bankların iştirakının minimum həcmi bir faiz, maksimum 10 faiz təşkil edir. "Milli Kart" sistemində 12 bank fəaliyyət göstərir.
Mərkəzin təsisçiləri bunlardır: Atabank, Dəmirbank, AzərTürkbank, Bank of Baku, Azərbaycan Sənaye Bankı, Debutbank, Amrahbank, Xalq Bank, Kredo Bank, AccessBank, Parabank, Rabitəbank, Bank Respublika, Bank Standard, Texnika Bank, Turan Bank, Unibank və Zamin Bank. "Milli Kart" MMC dörd milyon manatlıq kapitalla təsis olunub.
Martın 15-nə olan rəsmi məzənnə 0,7933 AZN/USD təşkil edir.
