Azərbaycan, Bakı, 28 mart /Trend, müxbir İ.Xəlilova/
2011-ci ilin sonunadək FOREX bazarı üzrə iş üçün Azərbaycanda yeganə platforma olan "MuğanBank" 500-dək müştəri hesabının açılacağını gözləyir. Bu barədə Trend-ə "MuğanBank"n idarə heyəti sədrinin birinci müavini Rəsul Cəlilov bildirib.
Ölkənin Mərkəzi Bankının qərarı ilə 2011-ci ildən Azərbaycanda birjadankənar beynəlxalq valyuta bazarı "Forex"də əməliyyatlar yalnız bank təşkilatları vasitəsilə aparılır.
"Bazarın həcminin çox böyük olmasına baxmayaraq, bankımız qarşısına ilin sonunadək 500 hesabın açılması kimi ciddi rəqəm qoyub. Hazırda hesabların orta məbləği 1000 dollar civarındadır, lakin biz insanlara hesab açmaq həcmini 500 dəfə ötən məbləğlərlə işləmək imkanı veririk", - Cəlilov deyib.
Onun sözlərinə görə, hazırda açılan hesabların sayında artım müşahidə olunur. Müştərilərin bu xidmətə marağı tamamilə gözləniləndir və bu, gündən-günə artır.
Bu bankda artıq 200-dən çox müştəri hesabı açılıb. Hər gün 5-6 hesab açılır.
Bank tərəfindən bu bazarda xidmətlərin göstərilməsi barədə qərar 2009-cu ilin yayında qəbul edilib. Bankın ticarət platformasının, zəruri sənədlərin və təqdim olunan xidmətlərin bütün spektrinin hazırlanması, eləcə də xarici tərəfdaş banklar arasında likvidlik ocaqlarının müvafiq kontragent-tədarükçülərinin axtarışı prosesinə "MuğanBank" bir ildən çox vaxt sərf edib, layihə real olaraq 2010-cu il iyulun 19-da işə salınıb.
Bu gün "MuğanBank"ın ticarət platformasının proqram-texniki kompleksi və "Meta Quotes Software Corp." şirkətinin məhsulu olan "Meta Trader-4" bazasında hazırlanmış "Trading Station" arzu edən hər kəsə real zaman kəsiyində proqramı yükləyərək öz kompüterində onu quraşdırmağa, "MuğanBank"la müqavilə əsasında "Forex" bank xidmətlərinin bütün kompleksini əldə etməyə imkan verir.
Bankı belə qərar qəbul etməyə on il ərzinə Azərbaycanda fiziki şəxslərin FOREX bazarına artan marağı səbəb oldu. Yeni texnologiyaların və internetin tətbiqi ilə insanlar müvafiq terminallar və saytlar vasitəsilə beynəlxalq valyuta bazarında baş verən qiymət dəyişiklikləri barədə öyrənmək imkanı əldə etdilər. Azərbaycanda insanların FOREX bazarına çıxışı imkanlarının əldə edilməsinə şərait yaradan və özəl şəxslərə xidmətlər təklif edən müvafiq operatorlar meydana çıxdı.
"Ziddiyyət onda idi ki, indiyədək maliyyə institutları olmayan şirkətlər maliyyə fəaliyyəti ilə (valyuta mübadiləsi əməliyyatları) məşğul olurdular, ona görə də Mərkəzi Bankın bu əməliyyatları bankların platformasına keçirməsi tamamilə özünü doğrultdu", - Cəlilov bildirib.
Bankların maliyyə bazarının bu seqmentinə keçidi prosesi bütün keçmiş SSRİ məkanında vahiddir. Əgər on il əvvəl Rusiyada bununla "TeleTrade", "Alpari" və başqa yüzlərlə dilinq mərkəzləri məşğul olurdusa, bu gün onların sayı onlarladır və bu əməliyyatlarla məşğul olmaq istəyən ofşor şirkətlər arasında vasitəçi olan dilinq mərkəzlərinin yerini banklar tutub. Məsələn, Rusiyada FOREX operatoru kimi "Alfa Bank", Latviyada "Rietumu Banka" çıxış edir və bu cür proseslər hər yerdə baş verir. Hətta Avropa ölkələrində FOREX bazarının ən iri operatorları "Deutsche Bank" (Almaniya), "Saxo Bank" (Danimarka), "MIG Bank" (İsveçrə) və digərləridir.